اسلام آباد۔ 04جنوری (اے پی پی) اسپیکر قومی اسمبلی سردار ایاز صادق نا سروکی ٹی قومی اسمبلی سیکرٹریٹ و ینگ پارلیمنٹرین فورم نا کنڈآن کشمیر نا سرحال آ جہانی سیمینار نا بنائ(اینو) پنچ شنبے آ مریک۔ پاکستان نا پارلیمانی تاریخ اٹی پارلیمنٹ اولیکو وار کشمیری الس نا حق خودارادیت نا معاملہ غا جہانی سیمینار اس اڈترفنگ ئِ۔ اسلام آباد اٹی سیمینار نا بنداوی مسخت جولائی 2016ءٹی برہان وانی نا شہیدی آن گڈ بھارتی فوج انا کنڈآن حق خودارادیت نا پوسکن بش مروک آ لہر ئِ توننگ و کشمیری الس آ کروک آ بیدادی ئِ جہانی کہول آ تالان کننگ نا ئِ۔ سیمینار اٹی پارلیمان نا باسک آتیان بیدس یورپین پارلیمنٹ برطانیہ، کینیڈا و قطبی امریکہ نا مندوبین آتیان بیدس 400 آن زیات ملکی مندوبین، تعلیمی چاہندار، جہانی احوالکار آتا نمائندہ و طالب علم آک بشخ ہلنگ ئُ۔ اسپیکر قومی اسمبلی سیمینار نا اڈتننگ نا فیصلہ ئِ کرے و باسک قومی اسمبلی شازہ فاطمہ خواجہ ئِ اونا کنوینر مقرر کرے۔ قومی اسمبلی سیکرٹریٹ نا رداٹ وزیراعظم محمد نواز شریف سیمینار نا بنائی دیوان اٹی ساڑی مریک وخت اس کہ اسپیکر قومی اسمبلی آن بیدس سلاہکار خارجہ سرتاج عزیز ہم سیمینار آن تران کیک۔ سیمینار اٹی کیہی سیشن آک مریرہ ہرافتیان چیئرمین سینیٹ، وزیراعظم آزاد کشمیر، وزیر مملکت اطلاعات و نشریات، صدر آزاد کشمیر تون اوار نمان شخصیت آک تران کیرہ۔
