کوئٹہ۔ 04جنوری (اے پی پی) حکومت بلوچستان نا ترجمان انوارالحق کاکڑ پارینے کہ پاک چین اقتصادی راہداری قومی شونہالی نا مریس وختی ڈٹ ئِ۔ بیجنگ اٹی مروک آ سی پیک نا اسیجائی کمکار کمیٹی نا دیوان اٹی بلوچستان کن 12ڈٹ آتا منظوری الس کن پوسکن آ سال انا ٹیکی اسے۔ داہیت ئِ او چارشنبے آ ”اے پی پی“ تون خصوصی ہیت وگپ اٹی پارے۔ انوارالحق کاکڑ پارے کہ السی جمہوریہ چین پاکستان نا دیرینہ سنگت ئِ ہراآزمائش نا ہر ساہت اٹی نن تون پبی تفینے ، سی پیک آن پاک چین سنگتی پین سوگو و مستحکم مریک ۔ اوپارے کہ گوادر بندرگاہ نا فعالیت آن واپاری سرجزآتیٹی ترندی و بے روزگاری نا پوسکن ئُ وارخواہی ودی مریک۔ گوادر بندرگاہ و سی پیک بلوچستان نا الس نا روشنا آخبت نا ضمانت ئِ۔ ترجمان پارے کہ اینخو سال گوادر بندرگاہ نا فعالیت و بلوچستان نا الس نا محرومی تا چٹفنگ و خوشگوار بدلی تا سال جوڑ مریک۔ کوئٹہ و گوادر اٹی سی پیک نا اہمیت و بھرم آتا بابت سیمینار اٹی آرمی چیف تون اوار ایلو بڑزکو سول و عسکری کمامدارآتا ساڑی مننگ داہیت انا صفاشاہدی اسے۔
