اسلام آباد۔ 02جنوری (اے پی پی) پاک چین اقتصادی راہداری دنیا ٹی جاری غٹ آن بھلا شونداری ڈٹ ئِ، 51ارب ڈالر مالیت آن زیات مالیت دا ڈٹ پاکستان ئِ ترند رفتار اقتصادی شونداری نا شاہراہ غا دیک، مریس، کشادہ و رکھوک سڑک ، توانائی نا ڈٹ ، انڈسٹریل پارکس و گوادر نا بندرگاہ دہشت گردی نا برخلاف جنگ اٹ زہمی پاکستان کن روشنا آخبت نا روشنائی ئِ۔ دا ڈٹ آن ڈیہہ نا مسہ ارب خلقت ئِ فائدہ مریک، دوشنبے آ وزارت ڈٹ بندی و شونداری و اصلاحات نا کمامدارآک اے پی پی ئِ پاریر کہ سی پیک نا گونڈ وختی ڈٹ 2018-2017ءوخت اس کہ مریس وختی ڈٹ 2020ءآن 2030ءاسکان پورو مریرہ۔ اوفک پاریر کہ تدوک آہفتہ بیجنگ اٹی شش می اسیجائی کمکاری (جے سی سی ) دیوان اٹی سی پیک نا رداٹ جاری ڈٹ آتیا مروک آ پیش رفت ناجاچ ہلنگا و داڑآ است جمی نا درشانی کننگا، اینخو سال اکن ملک اٹی اقتصادی راہداری ڈٹ اٹی پوسکن آ پروجیکٹ آتا اوار مننگ نا فیصلہ ہم کننگا۔ اوپارے کہ بروک آسال پاکستان اٹی 10 ہزار میگاواٹ بجلی نیشنل گیرڈ اٹی اوار مریک ہراٹی 5ہزار سی پیک ڈٹ آتیان بریک ۔ اوپارے کہ سی پیک نا رداٹ ٹرانسمیشن لین نا ڈٹ انا منظوری تننگا و دمدستی کاریم کننگ نا پارت جاری کننگا، دا ٹرانسمیشن لین نا کمک اٹ ملک انا سویل اٹی ودی مروک آ بجلی نیشنل گریڈ اٹی اوار مریک۔ اوپارے کہ دا دیوان اٹی ٹرانسپورٹ انفراسٹرکچر نا اِرا بھلو ڈٹ ملتان سکھر و حویلیاں تھاکوٹ۔کے کے ایچ ڈٹ آتیا کاریم نا رفتار آ است جمی نا درشانی ئِ کننگا، صنعتی بشخ انا اِرا پین اہم ڈٹ گوادر ایکسپریس وے و ایر پورٹ آ زوت کاریم نا بناءکننگ نا یخین دہانی کرفنگا۔ اوپارے کہ کراچی آن پشاور ایم ایل ون ریلوے نا اپ گریڈیشن ڈٹ انا زوت پوروی آ اصولی اتفاق کننگا۔ جے سی سی ملک انا ہر چار آ صوبائی ہیڈ کوارٹرآتیٹی ریل بیسڈ ماس ٹرانزٹ ڈٹ آتا منظوری تسنے ہرافتے ٹی گریٹر پشاور ماس ٹرانزٹ ، کراچی سرکلر ریلوے و کوئٹہ ماس ٹرانزٹ کون آ ڈٹ آک اوار ئُ۔ اورنج لین لاہور ڈٹ ئِ ہم سی پیک نا فریم ورک اٹی اوار کننگا، چین نا کنڈآن ماس ٹرانزٹ نا دا ڈٹ پاکستان نا غٹ صوبہ غاتا الس کن بھلو ٹیکی اسے، جے سی سی ٹی قراقرم ہائی وے تھاکوٹ آن رائے کوٹ136کلومیٹر شاہراہ نا بحالی آ اتفاق کننگا، خضدار بسیمہ ، شاہراہ نا اہم ڈٹ انا منظوری تننگاو ڈیرہ اسماعیل خان۔ ژوب روڈ ئِ اِرارویہ کننگ نا ڈٹ ئِ ہم منظور کرے۔ اوپاریر کہ گوادر اپ گریڈیشن ڈٹ آتا ہم منظوری تننگا تانکہ بندرگاہ نا استطاعت ئِ ودفنگ مرے۔ صوبہ غاتا کنڈآن گدریفوک آ ڈٹ آتیٹی کیٹی بندرسی پورٹ، نوکنڈی ماش خیل، چترال آن چکدرہ و میر پور مانسہرہ روڈ ڈٹ انا اصولی منظوری ہم تننگا، جے سی سی نا کنڈآن گوادر ماسٹر پلان ئِ پورو کننگ نا پارت کننگا تانکہ گوادر نا شونداری ڈٹ بندی نا رداٹ مرے، گوادر فری زون و پورٹ ڈویلپمنٹ نا کیہی ڈٹ آتیا کاریم ترند کننگ آ اتفاق کننگا۔ اوپارے کہ گوادر نا تہٹی ماہی گیر و کشتی جوڑ کروک آتے کن کاریم مریک و او بے روزگارمفسہ، گوادر ووکیشنل انسٹی ٹیوٹ نا جوڑ جاڑ نا کاریم ئِ پین ترند کننگ آ اتفاق ہم کننگا۔ انڈسٹریل ئِ آپریشن نا رداٹ صوبہ غاتا کنڈآن گچین کروک زونز آتا شمولیت نا فیصلہ مس، بناءٹی رشکئی اکنامک زون، چائنہ اکنامک زون دابیجی ، بوستان اکنامک زون، چائنہ اکنامک زون شیخوپورہ ، گلگت مخنداس، اسلام آباد و پورٹ قاسم اٹی اسٹیل مل انا ڈغار آ انڈسٹریل پارک، کشمیر اٹی بھمبر صنعتی زون و مومند ماربل انڈسٹریل زون نا ہند آتا پیدواری مسوسس، چینی ڈل برو ک آ سال نا بناءتیٹی جاچ ئِ ہلیک اوکان گڈ زرکاری نا چرجوئی بناءکیک۔
