اسلام آباد۔ 20 جولائی (اے پی پی) ترجمان دفترخارجہ ڈاکٹر محمد فیصل پارینے کہ مقبوضہ کشمیر اٹی انسانی حق انا خلاف ورزی تا بابت رپورٹ پاکستانی خارجہ پالیسی نا غٹ آن بھلا سرسہبی ءِ، دنیا داسہ سماکرینے۔ مقبوضہ کشمیر اٹی آرمڈ فورسز اسپیشل پاور ایکٹس (اے ایف ایس پی اے) واک انا کاریم اٹ اتنگ ، مواصلات و انٹرنیٹ نا بند کننگ کون آ کورانگا کانود نا مذمت ءِ کینہ۔ جمعہ نادے یوتھ فورم فار کشمیر نا کنڈآن ’’استصواب رائے و کشمیر نا بابت جہانی پٹ و پول ‘‘ نا سرحال آ دود آن تران کرسا ترجمان پارے کہ او آئی سی و یورپی یونین نا ڈل آزاد جموں کشمیرنا دورہ ءِ کننگ ءِ ، ننتون ڈکھنگ کن ہچ اس اف۔ اوپارے کہ داسہ وخت بسنے کہ جہانی برادری تینا وعدہ غاتیا عملدرآمد کرسا بھارت آ زور شاغے کہ او مقبوضہ کشمیر آن تینا تسلط ءِ چٹفے۔ ہیومن رائٹس کونسل جینوا ٹی پاکستان نا مسکوہی آخبتی مندوب ضمیر اکرم پارے کہ 1957 آن پد اقوام متحدہ کشمیر نا معاملہ ءِ گوجالانے ولے ہیومن رائٹس کمشنر نا دفتر حوصلہ کرسا رپورٹ جاری کرے۔ رپورٹ اٹی بھارت آ زور شاغنگانے کہ او کشمیری الس نا حق خودارادیت نا پورو شرف ءِ کے۔ یو این ایچ آر سی ٹی کشمیری ڈل انا سروک الطاف حسین وانی داوخت آ پارے کہ اقوام متحدہ نا رپورٹ اٹی 13آن زیات انسانی حق انا خلاف ورزی تا ذکر ءِ کننگانے۔ بھارت رپورٹ آن نہ من مسنے و داسہ بھارتی میڈیا رپورٹ ءِ بے بنداو ثابت کننگ کن پروپیگنڈا نا بناءِ کرینے۔
