اسلام آباد۔18مئی (اے پی پی): وفاقی وزیر تجارت جام کمال خان ءَ گوشت کہ حکومت ٹیرف ءِ عقلی کنگ ءِ وسیلگ ءَ ملک ءِ برآمدات ءَ را 60ارب ڈالر ءَ سر کنگ ءِ واستہ جامع اقتصادی پالیشی آنی سر ءَ عمل کنگ ءَ اِنت۔ وفاقی وزیر برائے تجارت جام کمال خان ءَ یک شمبے ءِ روچ ءَ ادا ”اے پی پی“ ءَ گوں ھاسیں گپ ءُ تران ءِ تہ ءَ گوشت کہ ٹیرف ءِ عقلی کنگ اقتصادی دیمروئی ءِ تہ ءَ مزنیں کردے پیلو کنت، ایشی ءِ تہ ءَ کسانیں، میان اُستمانی ءُ دراجیں مدتی اقتصادی ءُ تجارتی پالیشی ءِ مول ءُ مراد آنی وسیلگ ءَ راجی برآمدات ءَ را 60ارب ڈالر ءَ سر کنگ ءِ منصوبگ اِنت۔ وزیر تجارت ءَ گوشت کہ تجارت ءِ لبرل کنگ ءَ را دیمروئی دیگ ءَ ٹیرف کلیں کرد ءَ پیلو کن اَنت، ایشی ءِ واستہ حکومت ءَ مزن وزیر محمد شہباز شریف ءِ ہدایت ءِ رد ءَ سرجمیں ٹیرف پالیشی جوڑ کتگ ایشی ءَ چہ ملکی تجارت ءِ کساس گیش بیت ءُ پاکستان ءَ را نوکیں مارکیٹ آنی تہ ءَ گامگیج ءِ موہ رس ایت۔ جام کمال ءَ گوشت کہ حکومت ءَ آیوکیں 5سال آنی تہ ءَ ملک ءِ برآمدات ءَ را 60ارب ڈالر ءَ سر کنگ ءِ منصوبگ جوڑ کتگ ءُ اے درگت ءَ مزن وزیر محمد شہباز شریف پالیسی ءِ رہشونی دیگ ءَ اِنت۔ جتا جتائیں ملک آنی گوما آزاد تجارتی معاہدہ (ایف ٹی اے) ءِ بابت ءَ یک جُست ءِ پسو ءَ ، آئی ءَ گوشت کہ حکومت تجارتی تنوع ءِ سر ءَ کار کنگ ءَ اِنت تانکہ میاں اوستمانی مارکیٹ ءَ نوکیں چیز آنی دیم ءَ آرگ بہ بیت تانکہ ملک ءِ تجارت ءَ را گیش کنگ ءُ ملک ءَ را اے معیشت آنی گوما وتی تجارت ءَ را لبرل کنگ ءِ آپشن دیگ بہ بیت۔ وفاقی وزیر ءَ گوشت کہ پاکستان ءَ چین، ملائیشیا ءُ سری لنکا ءِ گوما ایف ٹی اے آناں گڈی رنگ داتگ ءُ ھمے رنگ ءَ ترکی، تھائی لینڈ ءُ ایران ءِ گوما ایف ٹی اے انگت ءَ گپ ءُ تران ءِ پڑ ءَ اَنت کہ ایشی ءِ تہ ءَ ٹیرف پالیشی ءِ کرد سک باز المی اِنت۔ آئی ءَ گوشت کہ میاں اوستمانی ملک ازبکستان، آذربائیجان ءُ انڈونیشیا ءِ گوما پاکستان ءِ ترجیحی تجارتی معاہدہ اے ملک آنی گوما تجارت ءِ تہ ءَ سک باز ارزشت ءِ واھند اِنت۔ وفاقی وزیر ءَ گوشت کہ پاکستان ءَ میاں اوستمانی ملک آنی گوما ھواریں دمگی ملک آنی گوما وتی تجارت ءَ را اولی ترجی داتگ ءُ شمالی ءُ جنوبی امریکہ ءِ غیر روایتی مارکیٹ آنی تہ ءَ ھم وتی پیداوار آناں دیمروئی داتگ۔ آئی ءَ گوشت کہ پاکستان گلوبل ءُ دمگی تجارت ءِ تہ ءَ آزاتیں تجارت ءِ کمک ءَ کنت ءُ اے درگت ءَ پالیشی ھم جوڑ کنگ بوھگ ءَ انت۔ یک جست ءِ پسو ءَ آئی ءَ گوشت کہ استیں حکومت ءِ ٹیرف عقلی کنگ ءِ پالیشی ءِ وژن ءَ ملک ءَ را گلوبل لبرلائزر جوڑ کتگ۔ ءُ اے یک مھکمیں معیشت ءِ رنگ ءَ ابھر بوھگ ءَ اِنت، ایشی ءَ چہ نہ ایوک ءَ ملکی برآمدات ءَ را گیش کنگ بیت بلکیں جتا جتائیں ملک آنی گوما پاکستان ءِ آزاد تجارتی معاہدے ءِ اثر ءُ رسوخ ءَ را ھم گیش کنگ بیت ءُ ملکی معیشت ءَ را (جی وی ایس گلوبل چین سپلائی) ءَ گوں ھمگرنچ کنت۔ آئی ءَ گوشت کہ ٹیرف ءَ راجدپتری رنگ ءَ برآمداتی مقابلہ ءُ صنعتی کارکردگی ءِ قیمت ءَ پاکستان ءَ آمدنی ءِ یک ھاسیں وسیلگ ءِ رنگ ءَ کرد پیلو کتگ۔ آئی ءَ گوشت کہ پاکستان ءِ اقتصادی بدلی، برآمداتی مقابلہ، صنعتی کارکردگی ءِ دیمروئی ءُ ممکنہ عالمی ءُ علاقائی مارکیٹ آنی گوما تجارتی یکجاھی ءِ واستہ ٹیرف ءِ عقلیت سک باز المی اِنت۔ وفاقی وزیر ءَ گوشت کہ اے یک ھاسیں پالیشی یے ایشی ءِ مول ءُ مراد ویلیو ایڈڈ ءُ مینوفیکچرڈ سامان آنی سر ءَ ٹیرف کم کنگ اِنت تانکہ ادارگی گنجائش ءَ را گیش کنگ، تجارتی معاہدہ آناں گیش مھکم کنگ ءُ برآمدات ءِ سر ءَ مبنی صنعتی کنگ ءَ را دیمروئی دیگ بہ بیت۔ جام کمال خان ءَ گوشت کہ حکومت ءِ ٹیرف عقلی کنگ ءِ پالیشی ءِ سبب ءَ ملکی معیشت کارآمد بیت ءُ پائیدار اقتصادی دیمروئی ءِ واستہ صنعتی پیداوار ءُ تجارتی مقابلہ ءِ ھاترا رس ایت۔ آئی ءَ گوشت کہ استیں دور ءَ ڈیٹا سائنس ءُ اعداد و شمار المی انت ءُ حکومت ءَ 15 ممکنہ برآمداتی شوبگ آنی جائزہ ءِ مطالعہ کتگ ءُ جتا جتائیں تک آنی نیمگ ءَ چہ دستیابیں ڈیٹا آنی رد ءَ ٹیرف آنی تہ ءَ کمی یا گیشی ءِ واستہ عملی پیسلہ کنگ ءِ پیسلہ کتگ۔ دگہ جست ءِ پسو ءَ آئی ءَ گوشت کہ دمگی تجارت حکومت ءِ مستریں دلگوشی اِنت ءُ آذربائیجان ءَ ھوار پنچ میان اُستمانی ملک یورپی ملک آنی گوما تجارتی ءُ اقتصادی سیادی ءَ را گیش کنگ ءِ واستہ المی اَنت۔ وفاقی وزیر ءَ گوشت کہ پاکستان ءِ گوما آیوکیں تجارت ءِ تہ ءَ ازبکستان، قازقستان، تاجکستان، ترکمانستان ءُ کرغزستان ھاسیں تجارتی شریک اَنت۔
