اسلام آباد۔ 02جنوری (اے پی پی) وزیراعظم محمد نواز شریف پارینے کہ شعر و ادب نا مون آدننگ آن راج اٹی تحمل ، سگ ، ہمدردی و غیر سگالی نا دودوربیدہ ئِ مون آ دننگ مریک۔ داہیت ئِ او قومی تاریخ و ادبی میرات کن تینا سلاہکار عرفان صدیقی تون ہیت وگپ کرسا پارے ہرادوشنبے آداڑے وزیراعظم تون اوڑدہی کرے۔ وزیراعظم پارے کہ علمی و ادبی ادارہ غاتے فعال جوڑ کرسا راج ئِ کتاب نا کنڈا مائل کننگ مریک۔ اوپارے کہ دا ادارہ غاتے تینا غرض و مسخت آتے کن ہروڑنا کمک فراوان کننگک۔ وزیراعظم پارے کہ ادیب، شاعرو دانشور آتے تینا تخلیق آتا اشاعت و مون آ دننگ کن ہروڑنا کمک فراوان کننگے۔ قومی تاریخ و ادبی میرات کن وزیراعظم نا سلاہکار عرفان صدیقی وزیراعظم ئِ ”زبان ادب و راج“ انا سرحال آ اڈ ہلوک آ چارمیکو جہانی کانفرنس نا غرض و مسخت آتیان معلومدار کرے۔ داکانفرنس 5جنوری آن 8جنوری اسکان اسلام آباد اٹی اڈہلیک۔
