اسلام آباد ۔ 30 دسمبر (اے پی پی) سینیٹ نا قائمہ کمیٹی دیر و بجلی نا دیوان جمعہ آ سینیٹر تاج حیدر نا کماشی ٹی پارلیمنٹ ہاﺅس اٹی مس ہراٹی کمیٹی نا باسک آتون اوار وزارت دیر و بجلی و ایلو تعلقدار سرکاری محکمہ غاتا بڑزکو افسرآک ساڑی ئسر۔ دیوان اٹی کمیٹی نا باسک آک سلاہ تسر کہ بجلی نا بشخ و چانٹ کروک کمپنی تا سروک آتے کمیٹی ٹی بٹنگ انگ نا بیدس ویڈیو لنک نا کمک اٹ اوفتیان بریفنگ ہلنگے انتئے کہ بشخ وچانٹ کروک کمپنی تا سروک آک ہراتم قائمہ کمیٹی نا دیوان اٹی بریرہ تو داڑآن قومی خزانہ ئِ بھلو نسخان اس رسینگک و وخت انا زیان ہم مریک۔ سینیٹر نعمان وزیر نا دا سلاہ نا کمیٹی ستائِ کرے و فیصلہ کرے کہ پین وخت اس ویڈیو لنک نا کمک اٹ بجلی نا بشخ وچانٹ کروک کمپنی تا چیئرمین تیان بریفنگ ہلنگک۔ وزارت دیر و بجلی کمیٹی ئِ پارے کہ بشخ وپانٹ کار کمپنی تا سروک آتیان وزارت ہم ویڈیو لنک نا کمک اٹ بریفنگ ہلیک۔ کمیٹی نا استفسار آ آئیسکو کمامدارآک کمیٹی ئِ تیرمہ ٹی کم وولٹیج نا معاملہ ئِ ایسر کننگ نا بابت گام گیج آتیان معلومدار کرسا پاریر کہ دا چرجوئی ٹی آئیسکو ڈٹ بندی اس کرینے ہرانا رداٹ غٹ ٹاسفارم آتے ایل ٹی آن ایچ ٹی آ گدریفنگک۔ چیف ایگزیکٹو آئیسکو کمیٹی ئِ پارے کہ 2018 ءاسکان ملک آن لوڈشیڈنگ ئِ چٹفنہ۔ کمیٹی ئِ مستی پاننگاکہ نومبر اسکان مچ آ ملک اٹی بجلی دُزی کروک آتا برخلاف 2083ایف آئی آردرج کرفنگانے۔ آئیسکو 480و فیسکو 422ایف آئی آر درج کرفینے۔ کمیٹی نندی پور، نیلم جہلم و ساہیوال ڈٹ آتیا خڑچ آتا بابت نعمان وزیر نا سروکی ٹی کمیٹی اس جوڑ کرے۔ غوث محمد نیازی و نثار محمد کمیٹی نا باسک مریرہ ہرا دا معاملہ غا رپورٹ مرتب کرسا کمیٹی ئِ پیش کیک۔
