اسلام آباد۔ 30 دسمبر (اے پی پی) وزیراعظم محمد نواز شریف پارینے کہ پاکستان نا الس ئِ مون تروک بنداوی ویل آتا ایسری کن ساڑی حکومت نا سخت کوشست و لگن نا بے کچ مثبت نتیجہ دوئی مسنے، بجلی نا بھلا بھلاڈٹ جاٹ آتون اوار اوار ملکی و علاقائی مواصلاتی ڈٹ آتیا ترندی اٹ کاریم جاری ئِ ہراڑآن ملک انا منظرنامہ و مقدر یکسر بدلینگک۔ اوداہیت ئِ جمعہ آ باسک قومی اسمبلی (این اے 162ساہیوال) چوہدری محمد طفیل تون ایوان وزیراعظم اٹی اوڑدہی ٹی ہیت وگپ کرسا پارے۔ وزیراعظم پارے کہ حکومت نا شونداری و شرحال اسکیم تا مسخت الس نا راجی و اقتصادی شرحالی و پاکستان ئِ اسہ شون ہلوک و شونہال ملک اس جوڑ کروئی ئِ ہراڑے ہر شاری ئِ اسہ وڑ وارخواہی دوبرے۔ وزیراعظم داہیت آ زورشاغاکہ الس نا نمائندہ غاتے تینا حلقہ نا خلقت آتون فعال رابطہ بایدے تخنگے تانکہ او اوفتے مون تروک ویل آتیان معلومدار مرے و اوفتا ایسری کن غٹ تر المی گام گیج کننگے۔ چوہدری محمد طفیل وزیراعظم محمد نواز شریف نا قائدانہ کڑد انا ستائِ کرسا پارے کہ ہراتم ساڑی حکومت اقتدار ئِ سنبھالا تو ملک ئِ کیہی چیلنج آک مون تروک ئسر ولے سروک دا چیلنج آتیان لمہ وطن ئِ سرسہبی اٹ کشانے و ویل آتا مون ئِ تورینے۔ اوپارے کہ ساڑی حکومت مچ آ ملک اٹی توانائی و شاہراتی ڈھانچہ نا بھلو ڈٹ آتا بنائِ کرے۔ باسک قومی اسمبلی پارے کہ ملک انا جم اٹنگا سلامتی نا حالیت آتیٹی نمان گچینی بسنے و لوڈشیڈنگ نا وخت ئُ پاس اٹی ہم نمان کمتی واقع مسنے ہرا ساڑی حکومت ناشاندار کارکڑد نا شاہدی اسے۔ اوپارے کہ پاکستان نا الس آ پت ئِ کہ وزیراعظم محمد نواز شریف نا سروکی ٹی پاکستان اسہ پوسکن ، جمہوری و شون ہلوک ریاست اسے ٹی بدل مریک۔ اوڑدہی ٹی وزیراعلیٰ پنجاب نا سلاہکار ریونیو چوہدری محمد ارشد جٹ ہم ساڑی ئس۔
