امن و ایمنی آن بیدس ملک اٹی شونہالی سلنگ کپک، انسانیت کن کاریم کننگ ننا غٹ انا اسیجائی زمواری ئِ

بنجائی وزیر مذہبی امور سردار محمد یوسف نا قومی امن کونسل نا دود آن تران
اسلام آباد۔ 29 دسمبر (اے پی پی) بنجائی وزیر مذہبی امور سردارمحمد یوسف پارینے کہ ساڑی دوراٹی امن وایمنی آن بیدس ملک ہم شونہال سلنگ کپک۔ انسانیت کن کاریم کننگ ننا غٹ انا زمواری ئِ ، نیت اٹی اخلاص مرے تو اللہ نا کمک اوار حال مریک۔ قومی امن کونسل نا دود آن تران کرسا اوپارے کہ پاکستان اٹی مسلمان و غیر مسلم غٹ بریبر نا شاری ئُ ہرافتا جان و مال انا رکھ کننگ حکومت نا زمواری ئِ ۔ اوپارے کہ 1973ءنا آئین اٹی داہیت انا ضمانت تننگانے کہ کس اسے تون امتیازی برتاﺅ کننگپ۔ ننے اسہ ایلو تون اواری اٹ دا ملک ئِ شونداری نا کنڈا روان کروئی ئِ۔ سردارمحمد یوسف نا پاننگ ئس کہ وزارت مذہبی امور ہم ملک اٹی امن وایمنی نا اڈتننگ کن کوشست کننگ اٹی ئِ۔ نن الس نا خذمت گار اُن۔ اوپارے کہ پاکستان دا ہند اسکان رسینگانے کہ نن دنیا ٹی امن و ایمنی نا اڈتننگ کن تینا مثبت کڑد ئِ ادا کننگ کینہ، انسانیت کن کاریم کننگ ننا غٹ انا اسیجائی زمواری ئِ ، نیت جوان مرے تو اللہ ہم کمک کیک۔ داوخت غٹ آن بھلا مسخت دنیا ٹی امن اڈ تننگ نا ئِ انتئے کہ امن و ایمنی آن بیدس ہچ ئُ قوم اس شونہال سلنگ کپک۔