حکومت دیر انا کاختی ئِ پورو کننگ کن کوڑی تا جوڑ جاڑ ودیر انا زیان ئِ توننگ کن پوسکن ئُ حکمت عملی اس ترتیب تننگ ئِ، بنجائی وزیر دیر و بجلی خواجہ محمد آصف

اسلام آباد۔ 29 دسمبر (اے پی پی) بنجائی وزیر دیر و بجلی خواجہ محمد آصف پارینے کہ حکومت دیر انا کاختی ئِ پورو کننگ کن کوڑی تا جوڑ جاڑ و دیر انا زیان ئِ توننگ کن پوسکن ئُ حکمت عملی اس ترتیب تننگ ئِ۔ ملک اٹی دیر انا ساڑی تنکی نا بابت نجی ٹی وی چینل تون ہیت وگپ کرسا اوپارے کہ مچ آ ملک اٹی پرتا مفننگ نا سوب دیر انا کاختی ودی مسنے ہرانا سوب ارسا ڈیم تیان دیر انا کشنگ ئِ بند کرینے تانکہ دیر ئِ فصل آتا پیداوار کن کاریم اٹ اتنگے۔ بنجائی وزیر پارے کہ داوخت تربیلا و منگلاڈیم تیٹی دیر انا کوڑی کم مننگ نا سوب مچ آ ملک اٹی لوڈشیڈنگ نا وخت ئُ پاس اٹی گڑاس ودکی خننگ انگ ئِ اونا باوجود حالیت آک حکومت نا کنٹرول اٹی ئُ انتئے کہ دا موسم اٹی دیر آن بیرہ اسہ ہزار آن 12سد میگاواٹ بجلی ہی ودی کننگک۔ اوپارے کہ دیر آن بجلی نا دوئی جون جولائی ٹی زیات مریک ہراتم 7 ہزار میگاواٹ بجلی دیر آن ودی کننگک۔ اوپارے کہ ڈیم تیٹی دیر بیرہ پرو گلیشیئر نا دیر مننگ آن ہی بریک و داحالیت آک داوخت آ کافی سنگین ئُ۔ اوپارے کہ حکومت دیر انا کاختی ئِ مون آ تخسا آبی کوڑی نا جوڑجاڑ آ کاریم بناءکننگ نا فیصلہ کرینے و بروک آ 3آن 4سال اٹی دا ریزروائیر پورو کننگک ہراڑآن دیر انا کاختی نا مون ئِ توننگ اٹی کمک رسینگک ۔ اوپارے کہ ماضی ٹی سیاسی بے چیٹی تا سوب ڈیم تاجوڑ جاڑ آ کاریم نا بناءکننگ متو ولے ساڑی حکومت دا مشکلات آتے مون آ تخسا مرمر انگا علاقہ غاتیٹی ریزیوایئر جوڑ جاڑ کننگ نا فیصلہ کرینے۔ دیر انا زیان نا بابت ہریفوک آ سوج انا ورندی ئِ ترسا اوپارے کہ خلق آتون اوار شارتیٹی ہم دیر انا کاریم اٹ اتنگ کن ہچ ئُ نظام اس وضع اف ہرانا سوب دیر ئِ بے دریغ کاریم اٹ اتنگک۔ بنجائی وزیر پارے کہ ساڑی حکومت دیر انا کاختی نا مون ئِ توننگ کن ملک انا کیہی علاقہ غاتیٹی پوسکن آ کوڑی تا جوڑ جاڑ و دیر انا زیان ئِ توننگ کن پوسکن ئُ حکمت عملی اس جوڑ کننگ ئِ ہراڑآن آخبت اٹی حالیت آک گچین مریرہ ۔