پاکستان ءُ آذربائیجان ءِ نیامءَ اوستءُ نزیکیں سیادی اَست
اسلام آباد۔21جون (اے پی پی ) سرپانک مزن وزیر جسٹس (ر) ناصرالملک ءَ پاکستان ءُ آذربائیجان ءِ نیامءَ اقتصادی کمک ءِ تہا گیشاں چہ گیش گیشی ءُ بیپار، زرکاری، توانائی ءُ دیمپانی ءِ پڑآنی تہا کمک ءَ را گیش کنگءِ ھاترءَ اہداف جوڈ کنگءِ ضلورت ءِ سرءَ زور پِرداتگ۔ آئیءَ اے گپ آذربائیجان ءِ سفیر علی فکرت اولوعلیزادہ ءَ گوں گپءُ تران کنانءَ کتگ کہ آواں پنچ شمبے ءِ روچءَ مزن وزیر کارگس ءَ آئی ءِ گوما گندءُ نند کتگ۔ سفیر ءَ مزن وزیر ءَ را آذربائیجان ءِ قیادتءِ نیکیں واھگ سر کتگءُ گشتگ کہ آئیءِ ملک پاکستانءِ گوما سیادی ءَ را سک باز ارزشت دنتءُ اقتصادی نزیکی ءَ را گیش کنگءِ واھشت مند اِنت۔ آئیءَ گشتگ کہ توانائی کمک ءِ ھوالگءَ حکومتی منءُ گرءِ سرءَ دستخط ءَ چہ دوھیں ملک آنی نیامءَ توانائی ءِ بازیں پڑآنی تہا کمک ءَ را گیش کنگءِ راھ تچک بنت۔ آئیءَ نگورنوکاراباخءِ ھوالگءَ آذربائیجان ءِ لیکہ منگءَ پاکستانءِ توسیپ کتگ۔ اے موھءِ سرءَ مزن وزیرءَ گشتگ کہ پاکستانءُ آذربائیجان ءِ نیامءَ اوستءُ نزیکی ءِ سیادی اَست اِنت۔ آئیءَ مارچ2017ءِ تہا اسلام آباد ءَ بوھوکیں 13می ای سی اوسمٹ ءَ ھوار بوھگءِ ھاترءَ صدر الہام علیوفءِ ترءُ تابءَ را ساڑاتگ۔ جسٹس (ر) ناصرالملک ءَ جموں و کشمیر ءِ جیڑھءِ سرءَ پاکستان ءِ یکوئی منگ ءَ ءُ جموں ءُ کشمیر ءِ ھوالگءَ او آئی سی نزیکی گروپ ءِ تہا آذربائیجان ءِ کردءَ را ساڑاتگ۔ مزن وزیر ءَ نگورنوکاراباخءِ جیڑھ ءِ سرءَ پاکستان ءِ اصولی مؤقفءِ درشانی کتگ۔ سرپانک مزن وزیر ءَ اے واھشت ءِ درشانی کتگ کہ اقتصادی کمکءَ را مزنیں تک ءَ سرکنگءِ کوشست کنگ بہ بیت۔ آئیءَ اے گپ ءِ سرءَ زو ر پِر داتگ کہ دوھیں ملک آناں بیپار، توانائی ، زرکاری ءُ دیمپانی پڑءِ تہا کمک ءَ را گیش کنگءِ ھاترءَ اہداف جوڈ کنگ لوٹ ایت۔ آئیءَ آذربائیجان ءِ صدرءِ ھاترءَ نیکیں واھشتانی درشانی کتگ۔
