چیف سیکرٹری خیبرپختونخوا محمد اعظم خان نافاٹا اصلاحات عملدرآمد نا بابت دیوان ءِ سرجم احوال تس
اسلام آباد ۔ 11 جون (اے پی پی) نگران وزیراعظم قبائلی علاقہ جات (فاٹا) نا الس ءِ احساس رکھ تننگ کن ضم کننگ نا عمل ءِ ترندی اٹ پورو کننگ نا پارت کرینے وخت اس کہ بنجا نابست و بندی قبائلی علاقہ جات (فاٹا) نا خیبرپختونخوا ٹی ضم کننگ نا بابت اڑاند و مشکل آتا چٹفنگ نا حکمت عملی اس جوڑ کننگ و دا عمل ءِ جوانی اٹ پورو کننگ کن بنجائی وزیر کانود ، انصاف و پارلیمانی امور نا سرکڑدہ ہی ٹی کمیٹی اس جوڑ کننگانے ۔ داہیت انا فیصلہ ءِ دوشنبے نادے نگران وزیراعظم جسٹس (ر) ناصر الملک نا کماشی ٹی فاٹا اصلاحات آعملدرآمد نابابت جاچ دیوان اٹ کننگا ۔ وزیراعظم آفس اٹی اڈ ہلوک آ دیوان اٹی بنجائی وزیر قانون بیرسٹر سیّد علی ظفر، وزیراعظم ناسیکرٹری، سیکرٹری سیفران، خزانہ وڈٹ بندی ڈویژن ناسیکرٹریز، چیف سیکرٹری خیبرپختونخوا، اے سی ایس فاٹا و ایلو سینئر کمامدارآک ساڑی ئسر۔ چیف سیکرٹری خیبرپختونخوا محمد اعظم خان فاٹا اصلاحات آعملدرآمد نابابت سرجم احوال تس وفاٹا ءِ ضم کننگ نا بابت پارلیمان آن ساڑی ہی ٹی منظور مروک آ آئینی ترمیم نا عملی اطلاق نابابت چندی انتظامی، کانودی ومالیاتی معاملہ غاتا پیدواری ءِ کرے ہرافاٹا نا ضم کننگ نا عمل ءِ جوان وڑاٹ جوڑ کننگ کن دمدستی چکار نا گرج ءِ ۔ داوخت اسکان کروک آ گام گیج آتا ذکر ءِ کرسا چیف سیکرٹری پارے کہ ایجنسی و فرنٹیئر رینجز ءِ داسہ خیبرپختونخوا ناضلع و سب ڈویژن آتیٹی بدل کننگانے وخت اس کہ پولیٹیکل ایجنٹ واسسٹنٹ پولیٹیکل ناعہدہ ءِ بدل کرسا داسہ ڈپٹی کمشنر و اسسٹنٹ کمشنر جوڑ کننگانے۔ دیوان ءِ پاننگاکہ ایجنسی ڈویلپمنٹ فنڈ انا چٹفنگ آن پد غٹ خراج، لیوی وراہداری نا چرجوئی ءِ بند کننگانے ۔ دیوان اٹی بشخ ہلوک آتے پاننگاکہ قبائلی ضلع غاتیٹی عدلیہ، پولیس، استغاثہ وجیل سروس بنا کننگ کن ڈٹ آتا مسودہ ءِ تیار کننگانے ۔ بورڈ آف ریونیو نا باسک دیوان نا بشخ ہلوک آتے بروک آ پنچ سال اکن مسکوہی فاٹا و پاٹا ناالس ءِ خراج استثنیٰ و ایلو مالیاتی ترغیب آتا بارواٹ احوال تس ۔ سیکرٹری خزانہ دیوان اٹی بشخ ہلوک آتے ضم کننگ ناعمل ءِ جوان وڑاٹ انجام تننگ وعلاقہ نا شونداری کن مالی وسیلہ جتا کننگ نا رداٹ احوال تس ۔ وزیراعظم ناصر الملک تیناہیت آتیٹی پارے کہ بنجا نا بست و بندی علاقہ جات ناخیبرپختونخوا تون ضم کننگ اسہ تاریخی ءُ پیش رفت اسے ہرانافاٹا نا الس نازند آگچین زہم تمک و دا علاقہ شونداری نا دوڑ اٹ اوار مریک ۔ وزیراعظم دا چرجوئی ٹی غٹ المی انتظامی، کانودی و مالیاتی ویل آتے ایسر کننگ نا گرج آ زور شاغا۔ دیوان اٹی بنجائی وزیر کانود، انصاف و پارلیمانی امور ناچیئرمین شپ اٹی اسہ کمیٹی اسے ناجوڑ کننگ ءِ ہم عمل اٹ اتنگا۔ داکمیٹی فاٹا نا خیبرپختونخوا ٹی ضم کننگ نا رداٹ اڑاند و مشکل آتاچٹفنگ کن حکمت عملی اس جوڑ کننگ و دا عمل ءِ جوان وڑاٹ پورو کننگ کن کاریم کیک ۔ کمیٹی ٹی چیف سیکرٹری خیبرپختونخوا محمد اعظم خان، ایڈووکیٹ جنرل خیبرپختونخوا، سیکرٹری داخلہ خیبرپختونخوا، اے سی ایس فاٹا وخزانہ، ریونیو و ڈٹ ڈویژن نا نمائندہ غاک اوار مریرہ ۔ کمیٹی ءِ تینا کاریم ءِ زوت آن زوت پورو کننگ نا پارت کننگا۔ وزیراعظم داہیت آ زور شاغا کہ فاٹا نا خیبرپختونخوا ٹی ضم کننگ نا عمل زوت پورو کننگے تانکہ مسکوہی فاٹا ناالس ءِ رکھ انااحساس مننگ کے ۔
