پاک، بنگلہ دیش ءِ تہی کارانی وزیر آنی گند ءُ نند، سائبر کرائم، پولیس ءِ تربیت ءِ ھلاسی ءِ تہ ءَ کمک ءِ تہ ءَ گیشی ءِ سر ءَ تپاک

اسلام آباد۔10جولائی  (اے پی پی): وفاقی تہی کارانی وزیر محسن نقوی ءَ وتی بنگلہ دیشی ھمکار  صلاح الدین احمد ءَ گوں گند ءُ نند کت۔ گند ءُ نند ءَ وت مہ وتی سیادی ، میاں اوستمانی استیں جاور ھال ءُ وت مہ وتی دلپدردی ءِ جیڈھ آنی سر ءَ ھیال ریچی کنگ بیت ۔ جمعہ ءِ روچ ءَ وزارت داخلہ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ دوئیں وزیر داخلہ آں یکجائی دلچسپی ءِ شوبگ آنی تہ ءَ کمک ءَ را گیش وسعت دیگ ءِ سر ءَ تپاک کتگ۔ اے موہ ءِ سر ءَ پولیس افسر آنی واستہ نوکیں لیکہ آنی سر ءَ تربیت ءُ ھوار بوھگ ءِ پروگرام آنی بندات ءِ ھوالگ ءَ ھم ھاسیں گپ ءُ تران کنگ بوت۔ دوئیں ملکاں یکجائی حکمت عملی ءِ سرا عمل کنگ ءُ استیں دور ءِ مزنیں چیلنج ھاسیں رنگ ءَ سائبر کرائم ءُ آن لائن فراڈ ءِ گیواری ءِ واستہ کمک ءَ را گیش کنگ ءِ پیسلہ کتگ۔ گند ءُ نند ءَ ایران ءُ امریکہ ءِ جیڈھ ءُ میاں اوستمانی تک ءِ سرجمیں ایمنی ءِ جاور ھال ءِ سر ءَ ھم سرجمیں رنگ ءَ گپ ءُ تران کنگ بوت۔ بنگلہ دیش ءِ تہی کارانی وزیر ءَ دمگ ءَ امن ءِ برجائی ءِ تہ ءَ پاکستان ءِ جوڑیشت ءُ جوانیں کرد ءِ سر ءَ مھکمیں لبز آنی تہ ءَ توسیپ کت۔ وفاقی وزیر داخلہ محسن نقوی ءَ گوشت کہ خطہ ءَ امن ءِ برجائی ءَ مزن وزیر ءُ فیلڈ مارشل ءَ ناقابل فراموشیں کرد پیلو کتگ۔ ما وتی یکوئی ءِ سیادی ءَ را گیش مھکم کنگ ءِ ھاترا دیم ءَ اتکگیں نوکیں موہ آناں سرجمیں رنگ ءَ پائدگ چست کنگ لوٹ ایں ۔