مزن وزیر شہباز شریف ءَ گوں ربیکا گرین اسپین  ءَ گند ءُ نند ءَ گوشت کہ سلامتی کونسل ءِ قرارداد آنی موثر ءُ سرجمیں رنگ ءَ عمل کنگ، میاں اوستمانی کانود ءُ میاں اوستمانی منوگری آنی احترام المی اِنت

اسلام آباد۔10جولائی  (اے پی پی):  مزن وزیر محمد شہباز شریف ءَ اقوام متحدہ ءِ سلامتی کونسل ءِ قرارداد آنی موثر ءُ سرجمیں عمل درآمد، میاں اوستمانی کانود ءِ احترام ءُ میاں اوستمانی منوگری آنی احترام ءَ را جھان ءِ امن، ایمنی ءُ وشھالی ءِ دیمروئی ءِ واستہ المی لیک اتگ۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اقوام متحدہ ءِ نامینتگیں سیکرٹری جنرل ربیکا گرین اسپین ءَ مزن وزیر گس ءَ مزن وزیر محمد شہباز شریف ءَ گوں گند ءُ نند کتگ۔ گند ءُ نند ءِ ساھت ءَ مزن وزیر ءَ کثیر نیمگی کمک ءِ ھوالگ ءَ پاکستان ءِ بے مٹیں جزم ءِ یک رندے پدا گوشت ءُ اقوام متحدہ ءِ منشور ءِ مول ءُ مراد ءُ اصول آنی دیمروئی ءُ پجائی ءِ واستہ پاکستان ءِ مھکمیں جزم ءِ درشان کت۔ مزن وزیر ءَ اقوام متحدہ ءِ سلامتی کونسل ءِ قرارداد آناں جہانی امن، ایمنی ءُ وشھالی ءِ دیمروئی ءِ واستہ جوانیں ءُ سرجمیں رنگ ءَ عمل کنگ ءِ لوٹ کت، ایشی ءِ تہ ءَ میاں اوستمانی کانود ءُ میاں اوستمانی منوگری آنی احترام کنگ المی اِنت۔ مزن وزیر ءَ اقوام متحدہ ءِ سئیں ستول امن ءُ ایمنی، دیمروئی ءُ انسانی حق آنی تہ ءَ متوازن پیشرفت ءِ ضلورت ءِ سر ءَ زور پر دات۔ آئی ءَ ھاسیں رنگ ءَ جھان ءِ دیمروئی ءِ ایجنڈا ءِ جوانیں رنگ ءَ سرجمی ءِ واستہ میاں اوستمانی کمک ءَ را گیش مھکم کنگ ءِ ارزشت ءِ سر ءَ زور پر دات ءُ دیمروئی کنوکیں ملک آنی دیم ءَ اوشتاتگیں جیڈھ آناں گیواری ءِ ھاترا زور پر دات۔ ربیکا گرین اسپین ءَ اقوام متحدہ ءِ تہا پاکستان ءِ دیریں ءُ ارزشتی ایں کرد ءِ ستا کرتگ ءُ دمگی امن ءِ دیمروئی ءِ ھاتر ءَ پاکستان ءِ نوکیں کوشست آنی ھم ستا کرتگ۔