چنگ ڈاؤ ۔ 10 جون(اے پی پی)صدرمملکت ممنون حسین وازبکستان ناصدر شوکت میر ضییوف تین پہ تینی مفاد نا بشخ آتیٹی کمکاری ءِ ودفنگ آ امنا کرینو ۔چنگ ڈاؤ چین اٹی صدر ممنون حسین تون ازبکستان ناصدر شوکت میرضییوف اوڑدہی کرے ۔ اوڑدہی ٹی صدر ممنون حسین تینا ازبک ہم منصب ناشنگھائی کمکارتنظیم نا رکنیت نا دوئی ٹی پاکستان نا مخ تفی ءِ کننگ آ منت واری ءِ ہرفے ۔صدرممنون حسین شنگھائی کمکارتنظیم (ایس سی او ) ناعلاقائی انسداد دہشت گردی سٹرکچر(آر اے ٹی ایس)اٹی ازبکستان ناکلیدی کڑد انا ستاءِ کرسا پاکستان نا کنڈآن علاقائی امن وسلامتی کن علاقائی انسداد دہشت گردی سٹرکچر(آر اے ٹی ایس) نا کوشست آتیا عملدرآمد نا عزم انا اعادہ کرے ۔ صدر ممنون حسین پارے کہ پاکستان وازبکستان نا نیام اٹ تاریخی، دودوربیدگ و ہڑتوم آ کنڈآتا تعلقداریک کیہی دہائی تیا ٹی ءُ و السی کہول آ رابطہ غاتے پین ودفنگ نا گرج ءِ ۔ اوازبکستان ءِ پاکستان نا رابطہ غاتا لائخی آن پبی فائدہ ہرفنگ نا پیش کش کرے ۔ صدرمملکت پارے کہ ازبک ایئرویز نا لاہور و تاشقند نانیام اٹ براہ راست جہازآتا بحالی آن ہڑتوم آ کنڈآتا سیل و سوات و السی کہول آ رابطہ غاتے ودفنگ اٹ کمک کڑد ادا کننگ کیک ۔ او پاکستان نا اوغانستان نا سرکڑدہ ہی ٹی اوغان امن عمل نا مخ تفی و جنگ زدہ ملک اٹی امن نا عزم انااعادہ کرے ۔ ہڑتوم آ راہشونک توانائی، کشت وکشار، تعلیم، انفراسٹرکچر وٹرانسپورٹیشن تون اوار تین پہ تینی است خواہی نا غٹ بشخ آتیٹی ہڑتوم آ کنڈآتا کمکاری ءِ ودفنگ آ امنا کریر ۔ہڑتوم آراہشونک واپار، معیشت، سرمایہ دودوربیدگ ، تعلیم، سائنس وٹیکنالوجی نا بشخ آتیٹی کمکاری نا چندی پلو آتا جاچ ءِ ہم ہلکر۔
