شنگھائی کمکار تنظیم نا سروک آتا کونسل نا18 می دیوان چینی شار چنگ ڈاؤ ٹی بنا کرے
چنگ ڈاؤ۔ 10 جون (اے پی پی) شنگھائی کمکار تنظیم نا سروک آتا کونسل نا18 می دیوان یک شنبے نادے چین نا شار چنگ ڈاؤ ٹی بناکرے ۔ بنائی سیشن اٹی غٹ باسک ملک آتا راہشون ومبصرین آک شرکت کریر۔ دادیوان چنگ ڈاؤ نا جہانی کانفرنس سنٹر اٹی اڈ ہلنگ ءِ ہرانا کماشی ءِ چین ناصدر شی جن پنگ کننگ ءِ ۔ چینی صدر نا سلہ غاصدر مملکت ممنون حسین دادیوان اٹی پاکستان نا نمائندگی ءِ کننگ ءِ ۔ تنظیم اٹی پاکستان نا پورو رکنیت آن پد دا اولیکو دیوان مننگ ءِ ۔ داکان مست پاکستان بطور مبصر کانفرنس اٹی شرکت کریکہ ۔ صدر ممنون حسین آن بیدس تنظیم نا ہشت باسک ملک آتاسروک آک بشمول بھارتی وزیراعظم نریندر مودی، قزاخستان ناصدر نور سلطان نذر بایوف ، چین ناصدر شی جن پنگ ، کرغزستان ناصدر ایس جین بیکوف، روس اناصدر ولادی میرپیوٹن، تاجکستان ناصدر ای رحمن وازبکستان ناصدر ایم مرزایوف شرکت کننگ ءُ۔ افغانستان ، بیلا روس ، ایران ، منگولیا وترکمانستان مبصرین ناوڑاٹ کانفرنس اٹی شریک ءُ ۔ داکان بیدس دا اہم انگا دیوان اٹی اقوام متحدہ ، دولت مشترکہ، اجتماعی سلامتی ناتنظیم ، سویل و دے ٹکی ایشیائی ملک آتا تنظیم، ایشیا اٹی پت سازی نا گام گیج آتا کانفرنس آئی ایم ایف و جہانی بین نانمائندہ غاک ہم دادیوان اٹی اوار ءُ ۔ بنائی دیوان آن چین نا صدر شی جن پنگ تران کرے وتنظیم نا اہمیت ءِ مون آ تخا ۔ داکان مست دیوان نا جاگہ غا بننگ آچین ناصدر مہمان تے بخیر کرے ۔ اوکان پد او سروک آتون گروپ فوٹو اس ہم ہلفے ۔
