چینگ ڈاؤ ۔09 جون (اے پی پی)پاکستانءُُ ایران ءَ گوشت کہ اوگانستان ءِ تہ ایمنی ءُُ گہبودی پاکستان ءُُ ایران دوئیں ملکاں پہ ارزشت دار انت۔ھپتگ ءَ ادا چہ جاڑی بیان ءِ ردا صدر مملکت ممنون حسین ءَ ایرانی صدر ڈاکٹر حسن روحانی ءِ گوما ادا چینگ ڈاو ءَ گند ءُُ نند کتگ۔دوئیں راھشوناں شنگھائی تعاون تنظیم کونسل ءِ باسک ملکانی راھشونی ءِ 18می دیوان ءِ تہ بہر زورگ ءِ ھاترا چین ءِ تروتاب ءَ انت۔گند ءُُ نند ءِ ساعت دونیمگی سیادی ،دمگی ءُُ میاں اوستمانی جاورھال ءِ سرا چار ءُُ ٹپاس کتگ۔ صدر ممنون حسین ءَ گوشت کہ پاکستان ءُُ ایرانءِ میان ءَ نزیکیں ،براھندگیءُُ وشیں سیادی انت۔آہاں کشمیر ءِ مھلوک ءِ جہد ءِ پلہ مرزی ءَ ایران ءِ راھدربر اعلی آیت اللہ خامنائی ءِ بیان ءَ ساڑاتگ،دوئیں صدور ءَ دونیمگی اقتصادی سیادی ءَ باز مھکم جوڈ کنگ ءِ ھاترا بیوپار گیش کنگ ءِ سرا تپاک کتگ ، دؤئیں راھشون ءَ اے گپے سرا ھم تپاک کت کہ گوادر ءُُ چاہ بہار ءِ سسٹر پورٹس بیوپار ءُُ راجی تبکے رھوت ءَ را گیش کنگ ءِ وسیلگ ءَ دونیمگی سیادی ءَ را گیش مھکم جوڈ کنگ ءَ کمکار پدر بنت۔یکجاھیں جامع پلان ءُُ ایکشن ءِ معاملا ءِ سرا صدر ممنون حسین ءَ امیت کت کہ اے پلان آف ایکشن ءِ دراھ ءِ فریق اے قولبند ءِ سرا وڈ ءُُ پیم جاڑی دارانت ءُُ اے ھوالہ ءَ وتی جزم ءَ پیلو کن انت۔دوئیں راھشوناں میاں اوستمانی جاورھال ءِ سرا ھم ھیال ریچی کنان ءَ اے گپ ءَ تپاک کت کہ میاں اوستمانی کانود ءِ رولز ءُُ راھبندءَ را برجاہ دارگ ءِ ھاترا ھاسیں دلگوشی ایر کنگ ءِ ضلورت انت۔میاں اوسمتانی ءُُ دمگی بحراناں چہ سفارتکاری ءُُ گپ ءُُ تران ءِ وسیلگ ءَ حل کنگ ءِ ضلورت انت۔دمگی جاورھال ءِ سرا ھیال ریچی کنان ءَ دوئیں راھشوناں زور مان کت کہ اوگانستان ءِ تہ امن ءُُ گہبودی پاکستان ءُُ ایران دوئیں ملکاں پہ باز ھاس انت۔
