چینی ہم منصب تون اوڑدہی ٹی ہڑتوم آ کنڈآتا کمکاری آ خیال آتا درشانی ءِ کیک
اسلام آباد ۔07 جون (اے پی پی)صدر مملکت ممنون حسین شنگھائی کمکار تنظیم نا18 می سرکڑدہ ہی دیوان اٹی بشخ ہلنگ کن اینو(جمعہ نادے ) چین آ کاہک ۔شنگھائی کمکار تنظیم نا سرکڑدہ ہی دیوان 9 و10 جون آچین نا دے ٹکی صوبہ شان ڈونگ نا کرکی شارچنگ ڈاؤ ٹی مریک ۔صدر مملکت ممنون حسین پاکستانی ڈل انا کماشی ءِ کیک و دیوان آن کلیدی تران کیک ۔ذرائع اے پی پی ءِ پارے کہ صدر مملکت تینا تران اٹی علاقائی جہانی معاملہ غاتیا پاکستان ناموقف ءِ بیان کیک و بشخ ہلوک آتے شنگھائی کمکار تنظیم اٹی آخبت اٹی پاکستان نا کڑد آن معلومدار کیک ۔صدر مملکت سرکڑدہ ہی دیوان نا وخت آ چین ناصدر شی جن پنگ تون اہم اوڑدہی کیک ہراٹی سی پیک تون اوار ہڑتوم آ کنڈآتا کمکاری آ خیال آتا درشانی ءِ کننگک۔داگدرینگوک آ اِرا تُو اٹی پاکستان وچین نا سرکڑدہ غاتا نیام اٹ ارٹ میکو بڑزکو کہولی رابطہ مریک ۔داکان مست ہندا سال اپریل اٹی مسکوہی وزیراعظم شاہد خاقان عباسی ہم باؤ فورم نا نیام اٹ چینی صدر تون ہڑتوم آ کنڈآتا اوڑدہی کریسس ۔صدر مملکت شنگھائی کمکار تنظیم نا ایلو باسک ملک آتا راہشون آتون ہم اوڑدہی کیک ۔ شنگھائی کمکار تنظیم نا سلاہ ئی سرکڑدہ ہی دیوان پاکستان کن بھاز اہمیت تخک انتئے کہ دا جون 2017ء ٹی شنگھائی کمکار تنظیم اٹی ودکی آن پد اولیکو سرکڑدہ ہی دیوان مریک ۔یات سلے کہ جون 2017ء ٹی آستانہ سرکڑدہ ہی دیوان اٹی پاکستان وبھارت ءِ تنظیم نا پورو رکنیت تننگاسس۔
