اسلام آباد ۔ 06 جون (اے پی پی) چیئرمین سینیٹ محمد صادق سنجرانی تون فاٹا وپاٹا نابزنس کمیونٹی نا اسہ ڈل اس پارلیمنٹ ہاؤس اٹی اوڑدہی کرے و ساڑی ہی ٹی پارلیمان آن منظور مروک آ آئینی ترمیم آن فاٹا وپاٹا ناواپار وبزنس کمیونٹی ءِ ممکنہ وڑاٹ پیش بروک آ ویل و اقتصادی رابطہ کونسل نا سفارش آتیا تینا گڑتی تیان سرجم وڑاٹ معلومدار کریر ۔ سینیٹ سیکرٹریٹ نارداٹ بزنس کمیونٹی ناڈل چیئرمین سینیٹ ءِ پارے کہ فاٹا ٹی دہشتگردی وانتہاپسندی نا سوب بھس کاری غٹ انا مون آٹی ءِ ، اوڑے نئے خلقت نا اُراک سلیسنو و نئے کاروبار۔ آئین اٹی ہرا ترمیم ءِ اتنگا اونارداٹ آرٹیکل 247ناشق (3)چٹنگ آن خراج آتا نظام نا دنگ فاٹا اسکان تالان مس وآرٹیکل 246نارداٹ تروک آ سپیشل سٹیٹس ہم چٹا دُن تو 5سال اکن خراج آن استثنیٰ تننگانے ولے دا کافی اف و دانا سوب آن و داسہ دا آئینی ترمیم نارداٹ اقتصادی رابطہ کونسل ہراسفارش آتا منظوری ءِ تسنے اوفتے ایف بی آر آن ایس آر او نا کمک اٹ لاگو کرفنگک ہراڑآن فاٹا نا الس و پوریا گر برادری ٹی بھلو بے چینی اسے ۔ او خواست کریر کہ ایف بی آر ءِ دا رداٹ ایس آر او جاری کننگ آن توننگے و ای سی سی نا سفارش آتیا نظرثانی کن مناسب گام گیج کننگے ۔ اوپارے کہ فاٹا ٹی جاری اصلاحاتی عمل وآئینی ترمیم آتا مسخت فاٹا ءِ شونداری نا بنجائی دنگ اٹ اتنگ نا ئس نئے کہ ہموننگا گام گیج کہ ہرافتیان الس اٹی بے چینی زیات مرے۔ ۔ اوپارے کہ ای سی سی ناسفارش آک ترمیم نااصل رو انا برخلاف ءُ و داڑآن بھلو کچ اسے آ ویل آک ودی مریرہ ۔ چیئرمین سینیٹ ڈل ءِ اوفتا ویل آتا ایسری نا باوری ترفے و پارے کہ اوفتا روا خواست و گڑتی تا ایسری کن مناسب گام گیج چست کننگک و داویل انا حساسیت ءِ ہرسا سینٹ نا قائمہ کمیٹی خزانہ نادیوان ءِ زوت بٹنگ انگک تانکہ غٹ اسٹیک ہولڈر آتون سلابت نا کمک اٹ ہندن ءُ سفارشات مربت کننگے ہرافتیان فاٹا وپاٹا ٹی لاگو مروک آ خراج آتے کن اسہ مناسب لائحہ عمل و نظام اس جوڑ کننگ مرے ۔
