ادارکی بنجاہی کابینہ ءَ سوگند چست کتگ،صدر مملکت ممنون حسین ءَ6 ادارکی بنجاہی وزیراں چہ ایشانی اگدھانی سوگند گپتگ،ادارکی مزن وزیر ناصر الملک ھم مراگش ءَ ساڑی ات
سوگند چست کنوکانی تہ عبداللہ حسین ہارون ، محمد اعظم خان ، ڈاکٹر شمشاد اختر ، سید علی ظفر ، محمد یوسف شیخ ءُُ مسز روشن خورشید بروچہ ھوار انت
اسلام آباد ۔ 5 جون (اے پی پی) ادارکی بنجاہی کابینہ ءَ سوگند چست کتگ۔صدر مملکت ممنون حسین ءَ 6ادارکی وزیراں چہ سوگند گپتگ۔اے درگت ءَ سئے شمبے ءَ ایوان ءِ صدرءَ مراگش برجم دارگ بوتگ ایشی ءَ ادارکی مزن وزیر ناصر الملک ھم ساڑی اتنت۔سوگند چست کنوکیں ادارکی بنجاہی وزیرانی تہ عبداللہ حسین ہارون ، محمد اعظم خان ، ڈاکٹر شمشاد اختر ، سید علی ظفر ، محمد یوسف شیخ ءُُ مسز روشن خورشید بروچہ ھوار انت۔مراگش ءَ بنگیجی قران پاک وانگ ءَ گوں بوتگ۔اے ساعت ءَ راجی ساز جنئگ بوتگ،مراگش ءَ ٹوھیں واکداراں بہر زوراتگ۔وزیرانی محکمہ ءِ جار پدا جنئگ بیت۔ صدر مملکت ممنون حسینءَ سوگندی مراگش ءِ پدا نوکیں وزراء ءَ را مرادباتی دیان ءَ آہانی ھاترا نیکیں واھشتانی درشان کتگ۔آہاں گوشت کہ ھداوندوزیر اگدھاں چہ انصاپ کن انت ءُُ پاکستان ءِ ہزمت ھم کن انت۔صدر مملکت ممنون حسین ءِ گوما ادارکی مزن وزیر جسٹس (ر) ناصر الملک ءُُ کابینہ ءِ باسکاں گند ءُُ نند کتگ۔اے درگت ءَ آہاں ادارکی کابینہ ءِ باسکاں را مرادبات داتگ ءُُ امیت کت کہ ملک ءِ تہ ساپ ءُُ پلگاریں گچینکاری ءَ سدکی جوڈ کنگ ءِ ھاترا ادارکی سرکار وتی ذمہ واری ءَ پیلو کنت ۔آہاں گوشت کہ کابینہ ءِ تہ گہتریں شہرت داروکیں تجربگ کار مردماں را زرورگ بوتگ ہمہ کہ کانود ءِ حاکمی ءَ گوں ھوار راجے امیت ءِ سرا پیلو بنت۔ صدرءَ گوشت کہ اے گپ دلجمی ءِ سبب انت کہ جمہوریت ءَ دومی رندا وتی وھد سرجم کتگ۔ ڈاکٹر شمشاد اخترءَ را ھزانگ ءِ وزارت ،اقتصادی امور ڈویژن ، منصوبہ بندی ءُُ دیمروئی ءِ قلمدان دیئگ ءِ گمان انت آہاں گوں اے پی پیءِ گونڈو ءِ گپ ءُُ تران کنان ءَ گوشت کہ معاشی جاورھال ءَ مھکم جوڈ کنگ ایشی ءِ دلگوشی بیت۔ عبداللہ حسین ہارون ءَ را ڈنی کارگس ءِ وزارت دیگ ءِ امکان انت ایش ءَ گوشت کہ دفتر خارجہءِ تہ بنداتی سرپدی گرگ ءِ پدا شؤرءُُ سلہ ءِ پدا دیما رواں۔یک جستے پسو ءَ آہاں گوشت کہ ملک ءِ پجار برز کنگ ءِ ھاترا ایشانی کِر ءَ باز آئیڈیا ھست انت بلے مزن وزیر ءِ راھبند ءِ ردا گامگیج زورگ بنت۔ امریکہءِ گوما سیادی ءِ باروا ءَ جست ءِ پسو ءَ آہاں گوشت کہ آہاں امریکی صدر ڈونلڈ ٹرمپ یک عمومی وڈیں امریکی صدر نیست ات،پاکستان ءَ را پیسلہ کنگ ءِ ضلورت انت کہ گوں ایشی ءِ کجام وڈ ءَ رھوت دیما برگ بنت۔آہاں گوشت کہ پاکستان ءَ را ہر رنگیں جیڈھاں ءَ را گیشینگ ءِ ھاترا سوگو ءِ بنیاتاں یکجاھ ءُُ ہم آھنگ پالیسی اختیار کنگ ءِ ضلورت انت۔بیرسٹر علی ظفر ءَ گوشت کہ ایشی ءِ دلگوشی لس گچینکاری ءِ ساپ ءُُ پلگاریں وڈ ءَ برجمی انت ءُُ اے ھاترا الیکشن کمیشن آف پاکستانءِ کمک کنگی انت۔ روشن خورشید بروچہءَ گوشت کہ زالبول ءُُ انسانی ھقانی جیڈھانی سرا ھاسیں دلگوشی دیاں ءُُ ایشانی جیڈھاں گیشنگءَ پہ وتی کرد پیلو کناں۔
