پاور سیکٹر تون گنڈوک انفورسمنٹ نا ویل آتے ایسر کننگ کن بایدے جامع ڈٹ اس تیار کننگے تانکہ بروک آ حکومت ءِ پاور سیکٹر نا کارکڑد و پائیداریت اٹی گچینی اتنگ اٹ آسانی مرے، وزیراعظم نا پارت
اسلام آباد۔ 05جون (اے پی پی) نگران وزیراعظم جسٹس (ر) ناصر الملک بجلی نا بشخ انا پائیداریت و دابشخ انا جم اٹنگا نظام ءِ گچین جوڑ کننگ کن وزارت پاور ءِ بجلی نا بشخ اٹی نسخان آتے کم کننگ کن گام گیج چست کننگ نا پارت کرینے۔ داخیال آتا درشانی ءِ او سے شنبے نادے داڑے وزیراعظم آفس اٹی پاور سیکٹر نا بابت اسہ بریفنگ اسے ٹی کرے۔ بریفنگ اٹی سیکرٹری پاور ڈویژن ، منیجنگ ڈائریکٹر پیپکو، ایم ڈی این ٹی ڈی سی و ایلو سینئر کمامدارآک ہم داوخت آ ساڑی ئسر۔ سیکرٹری پاور ڈویژن وزیراعظم ءِ ملک اٹی بجلی نا بشخ انا جم اٹنگا حالیت زار بشمول بجلی نا پیداوار ، ترسیل و بشخ وپانٹ نا بابت احوال تس۔ وزیراعظم ءِ ساڑی آ و آخبت خڑک اٹی بجلی نا ممکنہ طلب نا بارواٹ معلومدار کننگا۔ وزیراعظم ءِ پاننگاکہ 2013ء ٹی ملک اٹی بجلی نا پیداواری کچ 18753میگاواٹ ئس، داوخت ملک اٹی بجلی نا پیداواری کچ 28 ہزار 704میگاواٹ ءِ۔ وزیراعظم ءِ پاننگاکہ موسمی حالیت و داٹی دیر انا فراوانی ٹی کمتی نا سوب مئی 2018 ء ٹی دیر آن 3090 میگاواٹ بجلی دوئی کننگ انگ ءِ وخت اس کہ مئی 2015ء ٹی دیر انا بجلی نا پیداوار 6333میگاواٹ ئس۔ وزیراعظم ءِ پاننگاکہ روچہ مبارک نا تُو انا بابت بنجائی کابینہ ہرالوڈمینجمنٹ پلان نا منظوری ءِ تسوسس اوڑآ سختی اٹ عملدرآمد ءِ المی جوڑ کننگ کن غٹ گام گیج آتے کننگ انگ ءِ۔
