اسلام آباد۔05جون (اے پی پی) الیکشن کمیشن ءَ جسٹس (ر) دوست محمد ءَ خیبر پختونخوا ءِ سرپانک سروزیر نامینگ ءِ جار جتگ۔ سئے شمبے ءِ روچءَ الیکشن کمیشن ءِ دیوان چیف الیکشن کمشنر جسٹس(ر) سردار محمد رضا ءِ سروکی ءَ بوتگ کہ آئیءِ تہا کمیشن ءِ باسک ھم ھوار بوتگ اَنت۔ دیوان ءِ خیبر پختونخوا ءِ راجی اسمبلی ءِ اسپیکرءِ نیمگءَ چہ دیم داتگیں سرپانکیں سروزیر آنی 4نامانی سرءَ چارءُ بچار کنگ بوتگ۔ دیوان ءِ رندءَ الیکشن کمیشن ءِ حکام ءَ ھال در ءِ گوما گپءُ تران کتگءُ گشتگ کہ جسٹس(ر)دوست محمد خان ءَ را سرپانک سروزیر نامینگ بوتگ۔ حکام ءَ ھال داتگ کہ سرپانک سروزیر خیبر پختونخوا ءِ نامینگی ءِ پیسلہ تپاکی ءِ گوما کنگ بوتگ۔ زانگ بہ بیت کہ سرپانک سروزیر ءِ گچینی ءِ سرءَ سروزیرخیبر پختونخوا پرویز خٹک ءُ قائد حزب اختلاف مولانا لطف الرحمن ءِ نیامءَ تپاکی نہ بوھگءَ پد اے جیڑھ مزن گسی کمیٹی ءِ گور برگ بوتگ بلے آھودہ ھم ایشی ءِ سرءَ تپاکی کنگ نہ بوتگ پدا اسپیکر ءَ اے جیڑھ الیکشن کمیشن ءَ را دیم داتگ۔ الیکشن کمیشن ءَ را حکومت ءِ نیمگءَ چہ حمایت اللہ، اعجاز قریشی وھدے کہ اپوزیشن ءِ نیمگءَ چہ منظورآفریدی ءُ پیسرگیں چیف جسٹس پشاور ہائی کورٹ جسٹس دوست محمد ءِ نام ءَ دیم دیئگ بوتگ۔ کہ آئی ءِ تہا الیکشن کمیشن ءَ شورءُ صلاھ ءِ تپاکی ءَ گوں جسٹس (ر) دوست محمد ءَ را نامینتگ۔
