اسلام آباد۔ 04جون (اے پی پی) صدر مملکت ممنون حسین پارینے کہ پاکستان بیلاروس اتون صنعت ، واپار و کشت وکشار نا بشخ آتیٹی تعلقداری تا مون آ دننگ نا خواہش مند ءِ، داچرجوئی ٹی ہڑتوم آ ملک آتا نیام اٹ کمکاری نا بھلو گمان اس ساڑی ارے۔ اوداہیت ءِ دوشنبے نادے بیلاروس اکن پاکستان نا پندار سفیر لینا سلیم معظم تون ہیت وگپ کرسا پارے۔ داوخت آ ایلو بڑزکو کمامدارآک ہم ساڑی ئسر۔ صدر مملکت پارے کہ پاکستان بیلا روس اتون تعلقداری تے بھلو اہمیت اس ایتک۔ ہڑتوم آ ملک آتا نیام اٹ بے کچ دوستانہ مراسم ءِ و ہڑتوم آ ملک صنعت ، واپار و کشت و کشار تون اوار بھاز انگا بشخ آتیٹی ہڑتوم آ کنڈآتا کمکاری ٹی ودکی کننگ کیرہ۔ اوپندار سفیر ءِ پارت کرے کہ او ہڑتوم آ کنڈآتا است خواہی نا غٹ بشخ آتیٹی کمکاری ٹی ودکی آ دمدستی چکار کیر۔ صدر مملکت پارے کہ پندار سفیر بیلا روس اٹی تینا زمواری تے سنبھالنگ آن پد پوریا گر و صنعت کار آتا ہڑتوم آ کنڈآتا دورہ غاتیٹی ودکی نا بست و بند کے داڑآن ہڑتوم آ مک آتا تعلقدا رخلقت کمکاری نا پین بشخ پٹنگ کیرہ۔ صدر مملکت پارے کہ بیلاروس نا صدر لوکاشینکو پاکستان نا جوان ءُ سنگت اسے و او ہڑتوم آ ملک آتا نیام اٹ کمکاری ٹی ودکی کن پرجوش ءِ۔
