اسلام آباد۔ 03جون (اے پی پی) الیکشن کمیشن سپریم کورٹ نا فیصلہ غان پد ترمیم کروک گچین کاری شیڈول ءِ جاری کرینے پولنگ شیڈول نا رداٹ 25جولائی آ ہی مریک۔ الیکشن کمیشن نا کنڈآن جاری ترمیم کروک شیڈول نا رداٹ پنداری کاغد آک 4جون (دوشنبے نادے) آن 8 جون اسکان جمع کرفنگرہ۔ 8جون آ اومیت دار آتا بنائی فہرست ءِ جاری آویزاں کننگک۔ داکان مست جاری کروک شیڈول نا رداٹ پنداری کاغد آک 2جون آن 6جون اسکان وصول کننگارہ ولے لاہور ہائی کورٹ نا کنڈآن پندارکاغد آتا بابت پٹیشن آ تروک آ فیصلہ غان پد اوفتا ہلنگ ءِ توننگاسس۔ سپریم کورٹ یک شنبے نادے لاہور ہائی کورٹ نا فیصلہ ءِ معطل کرے اوکان پد داسہ پندار کاغد آتا ہلنگ آن بیدس ایلو غٹ کاررروائی مست آن جاری کروک شیڈول نا رداٹ مریک۔ ریٹرننگ آفیسر آتا کنڈآن اومیت دار آتا پندارکاغد آتا جانچ پڑتال 14جون اسکان مریک۔ ریٹرننگ آفیسر آتا کنڈآن اومیت دارآتاپندار کاغد آک منظور یا مسترد کننگ نا برخلاف اپیل 19 جون اسکان دائر کننگ مریک۔ ایپلٹ ٹریبونلز نا کنڈآن دااپیل آتیا فیصلہ 26جون اسکان کننگک۔ 27 جون آ اومیت دارآتا نظرثانی مروک فہرست ءِ جاری کننگک۔ اومیت دارآتا کنڈآن پندار کاغد آتے 28 جون آ پدی ہلنگ مریک اومیت دارآتا گڈیکو فہرست ءِ ہم ہندا دے آ جاری کننگک۔ اومیت آتے گچین کاری نشانات 29 جون آ الاٹ کننگک، پولنگ 25جولائی آ مریک۔
