چیئرمین سینیٹ نا پاکستان و ایران نا ہڑتوم آ کنڈآتا رابطہ غاتے پین مون آ دننگ کن پارلیمانی ، واپاری و اقتصادی بشخ آتیٹی کمکاری نا اہمیت آ زور
اسلام آباد۔ 01جون (اے پی پی) چیئرمین سینیٹ محمد صادق سنجرانی پاکستان و ایران نا نیام اٹ ہڑتوم آ کنڈآتا رابطہ غاتے پین مون آدننگ کن پارلیما نی، واپاری و اقتصادی بشخ آتیٹی کمکاری نا اہمیت آ زور شاغا و پارے کہ پاکستان و ایران الس نا شونداری و ڈیہہ نا شونہالی کن کوشست کننگ ءُ۔ اوپارے کہ ہڑتوم آ ملک آتانیام اٹ تاریخی تعلقداری تا بنداو آک مذہبی و دودوربیدگ و راجی مماثلت آ تیا تخنگانو ہرا وخت اتون اوار اوار پین سوگو مسنو۔ چیئرمین سینیٹ محمد صادق سنجرانی داخیال آتا درشانی ءِ جمعہ نادے پارلیمنٹ ہاؤس اٹی ایران نا سفیر مہدی ہنر دوست تون اوڑدہی ٹی کرے۔ چیئرمین سینیٹ پارے کہ پاکستان ایران تون تینا ہڑتوم آ کنڈآتا تعلقداری تے قدر انا نظر اٹ ہرک و دا تعلقداری تے پارلیمانی رابطہ غاتا کمک اٹ پین مون آ دننگ نا بھلو گنجائش اس ساڑی ءِ۔ او ہڑتوم آ ملک آتا نیام اٹ جہانی کہول آ کمکاری نا ستاءِ کرے و پارے کہ ساڑی آ منہ سال اٹی دفاعی و سیکورٹی نا بشخ آتیٹی تین پہ تینی کمکاری ءِ پین مون آ دننگ آ زورشاغا و پاک ایران تعلقداری تے پین سوگو کننگ کن تینا کمکاری نا باوری ترفے۔
