اسلام آباد۔ 31 مئی (اے پی پی) وزیر خارجہ انجینئر خرم دستگیر پارینے کہ ہراوخت اسکان امریکہ جمہوری حکومت آتون ہیت وگپ کپک ، دیرپا تعلقداریک جوڑ مننگ کپسہ، امریکی سوچ اٹی ارتقا اف، پاکستان ہراتم کہ دہشت گردی نا برخلاف گچین گام گیج کرے، امریکی امداد و کمکاری ٹی کمتی بس، امریکی ساڑی گری نا باوجود اوغانستان اٹی داعش نا منظم مننگ اسہ سوالیہ ءُ نشان اسے، پاکستان تینا خارجہ پالیسی نا علاقائی بحالی نا کمک اٹ نمان سرسہبی دوئی کرینے، مسلم لیگ (ن) نا حکومت نا دور اٹی پاکستان دہشت گردی ، توانائی تنکی و تموک آ معیشت نا تاریک دورآن اسہ پرامن ، اقتصادی لحاظ اٹ فعال و توانائی ٹی خودکفیل ملک اسے نا وڑاٹ شون ہلسا مون آ بسنے۔ پنچ شنبے نادے داڑے دفتر خارجہ نا ترجمان تون اوار خارجہ پالیسی نا بابت ساڑی آ حکومت نا پنچ سالہ کارکڑد نا بارواٹ صحافی تے احوال ترسا وزیر خارجہ پارے کہ گدرینگوک آ پنچ سال اٹی مشکل اسٹریٹجک چاگڑد و دہشت گردی و شدت پسندی نا برخلاف جنگ اٹی نن چندی چیلنج آتون مون تسن و نن تینا خارجہ پالیسی نا علاقائی بحالی نا کمک اٹ نمان سرسہبی دوئی کرینن۔ اولیکو مسکوہی وزیراعظم محمد نواز شریف و گڈ اٹی وزیراعظم شاہد خاقان عباسی نا کماشی ٹی دنیا خاص کر ہمسایہ ملک آتون خڑکی و گچین تعلقداری جوڑ کننگ کن کوشست آتے کریر، ننا بنداوی مسخت اقتصادی رابطہ و ملکی فائدہ ءِ مون آ دننگ، پارٹنر شپ ءِ سوگو کننگ ، سفارتی تعلقداری تے ودفنگ و انٹرنیشنل پروفائل ءِ بڑز کننگ نا ئس۔
