اسلام آباد۔ 31مئی (اے پی پی) وزیراعظم شاہد خاقان عباسی قومی اسمبلی نا مد پورو مننگ آ غٹ سیاسی جماعت، قوم ءِ مبارکباد ترسا پارے کہ 2013ء ٹی ہراچیلنج آک مون تروک ئسر اینو اوفتیان حالیت آک بھاز جوان ءُ، جولائی ٹی گچین کاری تا کمک اٹ الس ءِ فیصلہ کروئی ءِ کہ اقتدار ءِ دیر ءِ تروئی ءِ ، لس گچین کاری تیٹی اسہ دے اسے نا ہم ہرے مننگ ءِ سگپنہ ، قوم ءِ مون تروک ویل آتا ایسری کن قومی ڈائیلاگ نا گرج ءِ، ہر ادارہ نا آئینی دنگ و کڑد انا تعین کن قومی امنائی ودی کننگ ناگرج ءِ، پاکستان اٹی بھاز انگا معاملہ غاک ہند ن ءُ ہرافتا وار وار آذکر مریک۔ اسہ ٹرتھ کمیشن اس جوڑ کننگے ہرا ملک انا تاریخ نا بارواٹ چھان بین کے و حق ءِ مون آ اتے، آزاد میڈیا جمہوریت کن المی ءِ ، آزادانہ ،منصفانہ و شفاف گچین کاری ملک انا غٹ آن بھلا گرج ءِ۔ پنچ شنبے نادے قومی اسمبلی نا آخریکو دے آ سپاروکی تران اٹی وزیراعظم شاہد خاقان عباسی پارے کہ اینو ہرادا اسمبلی تینا مد ءِ پورو کننگ ءِ اسپیکر نا منت واری ءِ ہرفیوہ ہراوڑ او ایوان ءِ چلیفے، غیر جانبداری نا پوسکن ءُ آب جوڑ کرے۔ وزیراعظم پارے کہ اینو ارٹ میکو اسمبلی تینا مد ءِ پورو کننگ ءِ ہرا خوش آئند ءِ ۔ خورشید شاہ بطور قائد حزب اختلاف مثالی ءُ کڑد ادا کرے۔ پنچ سالہ دور اٹی جمہوریت آ بھاز انگا جلہو آک مسر، اسمبلی ءِ پرغنگ نا پیش گوئی مس، اخبار آک پُر ئسرہ ولے خورشید شاہ مدام اسمبلی نا مدءِ پورو کننگ نا ہیت کرے۔ اسمبلی نا مد ءِ پورو کننگ اٹ اونا کڑد انا اعتراف ءِ کینہ۔ او بطور اپوزیشن لیڈر سخت تقریر ہم کرے ولے مدادم کوشست کرے کہ جمہوریت مون آ کائے۔ وزیراعظم پارے کہ غٹ اپوزیشن جماعت آتا منت وار اُٹ ہرافک اختلاف رائے کریر، فاٹا نا ضم کننگ اٹ ہراتم ضرورت مس تو امنائی کننگا۔ وزیراعظم پارے کہ ای حکومت نا کارکڑد نا ذکر ءِ ضرور کیوہ۔ ہراتم ننا حکومت جوڑ مس ہمووخت انا حالیت آتے ہروئی مریک۔ 2013ء ٹی ملک اٹی امن و ایمنی و سیکورٹی نا حالیت آک غٹ انا مون آ ئسر، سول ملٹری امنائی اٹ اینو سیکورٹی و امن و ایمنی نا حالیت گچین مسنے۔ پاکستان نا الس آرام اٹ رہینگرہ ہچ ءُ خلیس اس اف۔ خطرہ غاتا مقابلہ ءِ کننگا۔ ننا فوج ہمو دشمن تون مقابلہ کرے ہرانا مقابلہ ٹی غٹ دنیا بے سہب مس۔ ننا فوج دنیا ءِ امن تس، کراچی ٹی غٹ جماعت آتا امنائی اٹ امن وا یمنی نا ویل ءِ ایسر کننگا۔ اینو ہموڑے بیرہ سٹریٹ کرائم ءِ ، اینو کراچی پرامن شار آتیان اسٹ ءِ۔ 2013ء ٹی کراچی نا شمار دنیا نا پنچ خطر ناک ملک آتیٹی مسکہ اینو 50 ٹی ہم اف۔ دا بھاز بھلو جمہوریت نا سرسہبی اسے۔ وزیراعظم پارے کہ معیشت 2013ء نا مقابلہ ٹی بھاز گچین ءِ۔ اقتصادی ٹک آک حالیت آتیٹی گچینی نا پیدواری ءِ کننگ ءُ۔ ہرا معیشت ءِ نن بروک آ حکومت ءِ ایتنہ او اوڑآن بھاز گچین مریک ہرا ننے ملاسس۔ شرح نمو ٹی چیلنج آتا باوجود گچینی بس اوپارے کہ پاکستان نا معیشت اٹی دالائخی ءِ کہ پاکستان نا الس ءِ روزگار نا وارخواہی تننگ کے۔ پاکستان ہندی و درملکی زرکارآتا اسہ مزل اسے۔
