اسلام آباد ءِ ماڈل و سیل و سواتی تے کن پرکشش ءُ شار اس جوڑ کینہ، دہشت گردی نا مخ ءِ پرغان ولے داسہ خار انا مخ ءِ پرغنگ نا گرج ءِ، وزیر داخلہ نا دود آن تران

اسلام آباد۔ 31مئی (اے پی پی) وزیر داخلہ احسن اقبال بنجائی دارالحکومت نا شاری تے آسراتی تننگ کن سٹیزن چارٹر ءِ جاری کرینے۔ پنچ شنبے نادے دارداٹ اڈ ہلوک آ دود آن تران کرسا وزیر داخلہ پارے کہ سٹیزن چارٹر 30 آسراتی شاری تے تننگ ءِ، اسلام آباد ءِ ماڈل شار اس جوڑکینہ، بجٹ نا زیات تر بشخ اسلام آباد اٹی آسراتی تننگ آ خڑچ کننگک۔ اوپارے کہ پولیس نا بھرتی تا آب ءِ گچین جوڑ کننگ انگ ءِ ، پولیس نا ورناتے اینٹی ریاٹ و کاؤنٹرٹیرارزم نا تربیت تننگ انگ ءِ ، پولیس کن جتا ءُ ہسپتال اس جوڑ کننگک۔ سول انتظامیہ ءِ ہنکینی آسراتی تننگک، دونیم ارب روپئی ٹرانسپورٹ ڈٹ اکن جتا کننگانے، مسہ نیم ارب نا خڑچ آن کنوئی ءُ صاف دیر فراوان کننگک۔ اوپارے کہ شست کروڑ آن دیر انا ڈغار نا تہٹی پیپ شاغنگک۔ وزیر داخلہ پارے کہ چڑیا گھر کن 20 کروڑ و پارک آتے کن ہم پیسہ جتا کننگانے۔ ملکی تاریخ اٹی اولیکو وار داخہ شونداری مسنے۔ اسلام آباد ءِ سیل و سواتی تا شار اس جوڑکینہ۔ سول و پولیس نا ادارہ غاتیٹی خواری کش آ بندغ آتے ایوارڈ بایدے ملے۔ حکومت نا فرض ءِ خلقت نا خذم تءِ کے۔ حرام و حلال اٹ پرخ ءِ سمجھنگ نا گرج ءِ۔ اوپارے کہ انتظامیہ و عدلیہ نا فرض ءِ کہ اواری اٹ ملک اکن کاریم کیر۔ عدالتی و نیب انا نوٹس آتا سوب اسہ آفیسر اس ہم کاریم کننگ کن تیار اف۔ ملکی انتظامیہ نا پہیہ ءِ جام کننگ آن نن دنیا نا مقابلہ ءِ کننگ کپنہ۔ نن بایدے ترندی اٹ گام ہرفنگ ءِ اولیت ایتن۔ اوپارے کہ کراچی آن گلگت و گوادر آن پشاور ہر بندغ پاہک کہ اینو پاکستان مستین نامقابلہ ٹی جوان ءِ۔ لوڈشیڈنگ و دہشت گردی آ پورو کنٹرول ءِ۔ نن دہشت گردی نا مخ ءِ پرغان ولے داسہ خار انا مخ ءِ پرغنگ نا گرج ءِ ۔ خار انا چٹفنگ کن ننے غٹ ءِ اواری اٹ کاریم کروئی ءِ۔