اسلام آباد۔ 31مئی (اے پی پی) تاپی گیس پیپ لین ڈٹ آن 2020 ء اسکان پاکستان اٹی گیس انا فراوانی نا عمل بناء کیک، مسلم لیگ (ن) نا دور حکومت نا دور اٹی تیل و گیس انا 116 پوسکن ءُ کوڑی خننگانے۔ وزارت توانائی پاور ڈویژن نا ذرائع نا رداٹ گدرینگوک آ پنچ سال اٹی جم اٹنگا توانائی مصر ف اٹی 2018 ء اسکان نا وخت اٹی 28 درسد اسکان نا ودکی مسنے۔ گدرینگوک آ پنچ سال اٹی تیل و گیس انا پٹنگ کن 46پوسکن ءُ لیسن جاری کننگا و 51لیز تننگا، ہنداوخت اٹی 116پوسکن ءُ خننگانو ہراکہ اسہ ریکارڈ اسے ، داڑآن 35ہزار بیرل تیل انا ودکی مس و پیداوار اسہ لکھ بیرل یومیہ غان گدرینگا وخت اس کہ 900 ایم ایم سی ایف ڈی گیس سسٹم اٹ اوارمسنے۔ داوخت اٹی گیس انا 445 پوسکن ءُ دُون خُتنگا ، 221 ٹی گیس انا پٹنگ سرسہب مس و سرسہبی نا کچ 50 درسد ئس۔ داکان بیدس ایل پی جی نا ملکی پیداوار اٹی ہم 100 درسد ودکی مسنے۔ جی ڈی ایس نا مد اٹی صوبہ غاتے بنجاء غان 2013ء ٹی 30 ارب روپئی تننگاسس وخت اس کہ 2017 ء ٹی صوبہ غاتے 73 ارب تننگا۔ 200 ارب روپئی نا خڑچ آن 42انچ قطر نا 1700 کلومیٹر نا ٹرانسمیشن پیپ لین شاغنگ وخت اس کہ روس و چین نا شریداری آن آخبت اٹی قطب سویل پین 2 پیپ لین شاغنگ نا بست وبند کننگانے ، (ن) لیگ نا دور اٹی 25 ہزار کلومیٹر مریس ڈسٹری بیوشن پیپ لین شاغنگانے۔ 2013 ء ٹی گیس انا اُرائی صارف آتا کچ 70 لکھ ئس، پنچ سال اٹی اُرائی صارف آتا کچ 90 لکھ اسکان سرمس و 20 لکھ ودکی صارف آتے میرٹ آ کنکشن تننگانے۔ ہندا مالی سال اٹی ملک اٹی گیس انا کھپت اٹ 20 درسد ودکی ریکارڈ کننگانے۔ جولائی 2017 ء آن ہلیس فروری 2018 ء اسکان ملک 3887 ملین کیوبک فٹ قدرتی گیس انا کھپت ریکارڈ کننگا ہرا گدرینگوک آ مالی سال نا ہندا وخت انا مقابلہ ٹی 20 درسد زیات ءِ، گدرینگوک آ مالی سال نا ہندا وخت اٹی 3,205ملین کیوبک فٹ گیس انا کھپت ریکارڈ کننگاسس۔ 12829 کلومیٹر ٹرانسمیشن ، 1لکھ 32ہزار 65کلومیٹر ترسیلی و 34 ہزار 631 کلومیٹر سروس لین نا کمک اٹ 8.9 ملین صارف آتے خذمت آتا فراوانی نا چرجوئی برجاءِ۔
