اسلام آباد۔ 30 مئی (اے پی پی) وزیراعظم شاہد خاقان عباسی تیل وگیس انا بشخ اٹی حکومت نا پنچ سالہ کارکڑد ءِ بے مثل گوندسا پارینے کہ اینو اُرائی و صنعتی صارف آتون اوار ہر صارف ءِ ہڑزآن و وافر گیس ملنگ ءِ، گدرینگوک آ پنچ سال اٹی گیس، تیل ، ایل این جی، ایل پی جی نا بشخ آتیٹی نمان سرسہبی دوئی کرینن، فخر ءِ کہ تیل و گیس انا بشخ ءِ بڑزکو جہانی آب اٹ ہم آہنگ کرینن، قطر معاہدہ نا رداٹ دنیا ٹی ہڑزآن انگا ایل این جی ءِ پاکستان آ ایسونن، دنیا نا بھلا کمپنیک ایل این جی نا بشخ اٹی ارب آ ڈالر نا زرکاری ٹی است خواہی ظاہر کننگ ءُ، تاپی گیس پیپ لین آ کاریم ترندی اٹ برجاءِ، 2020 ء ٹی تاپی ڈٹ آن گیس فراوانی بناء کیک، اولیکو وار 200 ارب روپئی نا خڑچ آن 1700 کلومیٹر گیس پیپ لین و 25 ہزار کلومیٹر ڈسٹری بیوشن پیپ لین شاغنگا۔ جہانی آب انا 3 پوسکن ءُ آئل ریفائنری جوڑ کننگ انگ ءِ، گچین کاری تا بارواٹ قیاس آرائی مننگ ءِ، ننے اونا پرواہ ہی اف، آئین 60 دے انا موکل ایتک دا مد اٹ الیکشن آتا مروئی ءِ، ہرادانا خلاف ورزی ءِ کیک اوڑآ آئین نا آرٹیکل شش بایدے لاگو مرے ، ایل این جی نا بابت قطر معاہدہ پی ایس او نا ویب سائٹ آ ینو ہم ساڑی ارے، دادنیا نا ہڑزآن انگا معاہدہ ءِ، ہراسٹ ءِ دوبہ خلوئی ءِ خلے، دوبہ غاتے کنے آ خلے، آفیسر و محکمہ غاتے تنگ کپس، ای ہر دوبہ نا ورندی ءِ تننگ کن تیار اُٹ، کنے آ ہمو بندغ دوبہ خلے ہراپاننگ کے کہ ہراتم او سیاست اٹ بسوسس ہمووخت اونا میرات و وسیلہ غاک زیات ئسر و اینو کم مسنو، ای ہراتم 30 سال مست سیاست اٹ بسوسٹ تو کنا میرات و وسیلہ غاک زیات ئسر اینو اوفتے ٹی کمتی بسنے، کنے کنا جماعت وزیراعظم نا منصب آ تخانے، کنا زمواری کاریم کننگ ناءِ و ای پنچ شنبے نا نن 11بجہ ءُ 59 منٹ 59 سیکنڈ اسکان کاریم ءِ برجاتخیوہ۔ او چارشنبے نادے وزیراعظم آفس اٹی تیل و گیس نا بشخ اٹی پاکستان مسلم لیگ (ن) ناحکومت نا 5سالہ کارکڑد نا بابت پریس کانفرنس آن تران کریکہ۔ بنجائی وزیر اطلاعات و نشریات مریم اورنگزیب و وزیر خزانہ مفتاح اسماعیل ئسک ہم اوڑتون اوار ئسر۔ وزیراعظم شاہد خاقان عباسی پارے کہ ساڑی آ حکومت ہراوڑ ایلو بشخ آتیٹی نمان سرسہبی دوئی کرینے ہنداوڑ تیل و گیس انا بشخ اٹی ہم بھاز بھلو سرسہبی دوئی کرینے و دوررس بدلی ایسونے ہراکیہی عشرہ غاتسکان فائدہ تروک جوڑ مریک۔
