اسلام آباد۔ 30 مئی (اے پی پی) قومی تاریخ و ادبی میرات کن وزیراعظم نا سلاہکار عرفان صدیقی پارینے کہ نیشنل لائبریری پاکستان داسہ نئے بیرہ اسلام آباد بلکن مچ آ ملک انا اسہ مثالی ءُ مطالعہ گاہ اس جوڑ مسنے۔ 1993ء ٹی اونا جوڑ کننگ آن ہلیس اسہ سال اس مست اسکان دا لائبریری ءِ است ہسون حد اسکان گوجالنگا ولے گدرینگوک آ یکونیم سال انا وخت اٹی یانزدہ کروڑ روپئی نا خڑچ آن بناء کروک آ ڈٹ آک لائبریری نا چاگڑد و آسراتی تے گچین جوڑ کننگ اٹ اہم کڑد ادا کرینے۔ عرفان صدیقی داہیت ءِ اینو نیشنل لائبریری اسلام آباد اٹی زالبول کن جوڑ کروک خصوصی ریسورس سینٹر نا افتتاح ءِ کرسا پارے۔ دا سینٹر قومی کمیشن وقارِ نسواں نا شریداری اٹ جوڑ کننگانے۔ عرفان صدیقی کمیشن نا سیکرٹری مسز ثمینہ حسن نا منت واریءِ ہرفسا پارے کہ دا بنجا، زالبول ءِ جاچ ہلنگ، پٹ وپول و تصنیف و تالیف کن گچین چاگڑد اس ایتک۔ داوخت آ تران کرسامسز ثمینہ حسن قومی تاریخ و ادبی میرات ڈویژن نا منت واری ءِ ہرفے و پارے کہ زالبول کن کتاب و ایلو المی آسراتی تا تننگ کن کمشن پبی کمکاری ءِ برجاتخک۔ عرفان صدیقی اینو نیشنل لائبریری ٹی بصارت آن محروم بندغ آتے کن خصوصی پروگرام تیان آراستہ بیست کمپیو ٹرز آتیا تالان اسہ کمپیوٹر لیب اسے نا ہم بناءِ کرے۔ اووزارت انفارمیشن ٹیکنالوجی نا منت واری ءِ ہرفسا پارے کہ دا کمپیوٹر لیبارٹری ’’گوشۂ نور‘‘ اٹی بے کچ قیمتی ءُ ودکی اسے۔ عرفان صدیقی داوخت آ پونے شش کروڑ روپئی نا خڑچ آن بناء کروک آ ڈیجیٹائزیشن ڈٹ انا ہم بناءِ کرے۔
