اسلام آباد۔ 30 مئی (اے پی پی) جرمنی نا نمائندہ خصوصی اوغانستان و پاکستان پوٹزل مارکس جرمن سفیر کوبلر مارٹن تون اوار اسپیکر قومی اسمبلی سردار ایاز صادق تون اوڑدہی کرے۔ اوڑدہی ٹی ہڑتوم آ کنڈآتا تعلقداری و تین پہ تینی اہم معاملہ غاتیا خیال آتا درشانی ءِ کننگا۔ اسپیکر سردار ایاز صادق پارے کہ پرامن ، سوگو و محکم اوغانستان پاکستان تون اوار مچ آ ڈیہہ نا گچین فائدہ ٹی ءِ۔ پاکستان اوغانستان تون سوگو تعلقداری و ڈیہہ نا امن و شونہالی کن اواری اٹ کاریم کننگ خواہک۔ اوپارے کہ پاکستان و اوغانستان ہڑتوم آک دہشت گردی نا خلوک ءُ ، و داناسور نا سوب پورو وڑاٹ زہمی مسونن۔ اسپیکر قومی اسمبلی سردار ایاز صادق پارے کہ پاکستان و جرمنی نا دوستانہ تعلقداری ءِ ہرافتے مریس وختی پارلیمانی و اقتصادی کمکاری نا کمک اٹ پین سوگو جوڑ کننگ مریک۔ پاکستان ڈیہہ ٹی امن و سوگوی نا مون آ دننگ اٹ است خواہی تخک و دامسخت نا دوئی کننگ کن پدریسہ کوشست کننگ ءِ۔ اسپیکر پارے کہ جرمنی پاکستان نا مخلص و حقی سنگت ءِ و ہڑتوم آ ملک آتیٹی پارلیمانی و سیاسی کہول آ رابطہ غاتے مون آ درسا ہڑتوم آ قوم تے پین خڑک اتنگ مریک ۔ دسمبر 2017 ء ٹی اسلام آباد اٹی اڈ ہلوک آ اولیکو 6 ملکی اسپیکر کانفرنس ہراٹی پاکستان آن بیدس روس، ترکی ، ایران، چین و اوغانستان شرکت کریر۔ داکانفرنس اٹی ڈیہہ ٹی دہشت گردی نا چیلنج تون مون تننگ و شونہالی و شونداری کن خڑکی کمکاری آ خیال آتا درشانی ءِ کننگا۔
