حویلیاں۔ 29 مئی (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) مچ آ ملک اٹی سد آ شونداری ڈٹ آتے سرسہبی اٹ پورو کرے ہرا ملکی تاریخ اٹی بے مثال ءُ کارنامہ اسے، مسلم لیگ (ن) الس نا خذمت آ یخین تخک، 25جولائی آ الس سجفسا و تینا ضمیر نا رداٹ ننا کارکڑد ءِ مون آ تخسا فیصلہ کیر۔ اوداہیت ءِ سے شنبے نادے 120 کلومیٹر مریس حویلیاں ۔تھاکوٹ موٹروے نا بناءِ کرسا پارے ہرا پاک چین اقتصادی راہداری نا اہم ءُ بشخ اسے۔ وزیراعظم پارے کہ محمد نواز شریف نا وژن نا پیروی ءِ کرسا پارٹی تینا غٹ وعدہ غاتے پورو کرینے۔ نن ملک انا شونداری و شونہالی آ باور کینہ۔ وزیراعظم پارے کہ مسلم لیگ (ن) تینا پنچ سالہ دور اٹی پرعزم وڑاٹ الس نا خذمت ءِ کرے و ملک انا کم شون ہلوک و مر مر انگا علاقہ غاتیا چکار کرسا راستکی بدلی اتنگ کن خواری اٹ کاریم کرے۔ اوپارے کہ مسلم لیگ (ن) دھرنہ و غیر شائستہ زبان ءِ کاریم اٹ اتنگ نا سیاست آ باور کپک ، او مدام شائستگی و شرف نا سیاست ءِ مون آ درینے۔ شاہد خاقان عباسی پارے کہ پاکستانی الس مسلم لیگ (ن) نا کنڈآن شونداری کاریم تا شاہد ءُ و 25جولائی آ الس تینا آخبت نا فیصلہ ءِ کیک، الس ہرافیصلہ ءِ کیک اودے امنا کننگک ، ننے پنچ سال ءِ ہندافتیا گدریفوئی ءِ و ننا غٹ آن زیات کوشست ہندا مس کہ حکومت تینا مد ءِ پورو کے 31مئی آ د امد پورو مننگ ءِ داکان پد ننا دا کوشست ئس کہ گچین ءُ نگران وزیراعظم اس تننگے اونا پڑو ءِ ہم کننگانے، داسہ 25جولائی آ گچین کاریک مریرہ و فیصلہ الس ءِ کروئی ءِ، ہندا جمہوریت ءِ ، دا ہمو وڑ ءِ ہراڑآن پاکستان شون ہلیک۔ اومیت کیوہ کہ الس تینا ضمیر نا رداٹ سیاست ءِ ہرسا گچین ءُ فیصلہ اس کیرہ۔ وزیراعظم پارے کہ دا ڈٹ علاقہ ءِ موٹروے نیٹ ورک اتون گنڈک۔ السی شونہالی اتسا بریک۔ اوپارے کہ حکومت 142 ارب روپئی نا خڑچ آن دا ڈٹ ءِ پورو کرے، دا وڑنا بھلو ڈٹ اسے پورو کننگ چنکو ہیت اس اف۔ اوپارے کہ گڑاس تکنیکی مشکل آتا سوب مانسہرہ اسکان نا بشخ انا پوروی نا کاریم نومبر اسکان تاخیرنا سوب جوڑ مس ولے اومیت ءِ کہ بروک آ ڈیڈلائن اسکان دا پورو مریک۔ شاہد خاقان عباسی پارے کہ مسلم لیگ (ن) داکان مست تینا گدرینگوک آ دور اٹی 550 کلومیٹر نا موٹروے پور و کرے و داسہ 1700 کلومیٹر نا 6 رویہ جہانی معیار نا روڈ آتیا کاریم کننگ ءِ ہرا گوادر ءِ خنجراب و پشاور ءِ کراچی تون گنڈک۔ داوخت آ گورنرخیبرپختونخوااقبال ظفر جھگڑا ، ڈپٹی اسپیکر قومی اسمبلی مرتضیٰ جاوید عباسی، وزیر مذہبی امور سردار محمد یوسف، صوبائی باسک قومی اسمبلی آمنہ سردار، چیئرمین این ایچ اے ئسک ہم ساڑی ئسر۔
