اسلام آباد۔ 28 مئی (اے پی پی) وزیراعظم شاہد خاقان عباسی مسلم لیگ (ن) نا حکومت نا پنچ سالہ مد اٹی اقتصادی کارکڑد نا جاچ ءِ پیش کرسا پارے کہ معاشی حساب و کتاب آن مسلم لیگ (ن) نا حکومت سرسہب پالیسی و دوررس وژن نا عکاسی مریک ہراڑآن قومی معیشت بحال مرسا سوگوی نا کسر آ روان مسنے، الس کارکڑد کن ننے وونٹ تسوسس، نن تینا کارکڑد نا کمک اٹ وونٹ ءِ شرف تسونن، مسلم لیگ (ن) ولدا ہم حکومت جوڑ کیک و اقتصادی حالیت آتیٹی پین گچینی اتیک۔ اوداہیت ءِ دوشنبے نادے وزیراعظم آفس اٹی پریس کانفرنس آن تران کرسا پارے۔ داوخت آ بنجائی وزیر خزانہ مفتاح اسماعیل و بنجائی وزیر اطلاعات و نشریات مریم اورنگزیب ہم اوڑتون اوار ئسر۔ وزیراعظم پاکستان مسلم لیگ (ن) نا حکومت نا 5سالہ اقتصادی کارکڑد نا بابت چندی اقتصادی بشخ آتیٹی 2013ء و 2018 ء نا حساب وکتاب پیش کرسا پارے کہ 2013ء ٹی جی ڈی پی نا نمو 3.68 درسد ئس و اینو 5.79 درسد ءِ۔ صنعتی شونداری 2013ء ٹی 0.75درسد ئس ، 2018 ء ٹی 5.8 درسد ءِ، لارج اسکیل مینو فیکچرنگ جولائی آن مارچ 2013ء ٹی 3.35درسد وخت اس کہ 2018 ء ٹی 5.89 درسد سلیس، تعمیرات نا بشخ اٹی بے پناہ کاریم مسنے، دابشخ اٹی 2013 ء ٹی گروتھ 1.08 درسد آن 2018 ء ٹی ودسا 9.13 درسد مس ہراکہ 8 گنا ودکی ظاہر کیک۔ اومیت ءِ کہ بروک آ حکومت ہم ننا مریک و داڑآن پین گچینی بریک۔ بنجائی سرکاری ملازم آتے مسہ بنداوی پنداوڑی تا اعزازیہ نا بابت سوج انا ورندی ٹی اوپارے کہ ہرسال حکومت اعزازیہ ایتک ہراکہ اسہ وڑ متوکہ، گڑاس وزارت اٹی اِرا بنداوی پنداوڑی ، تو کس اسے ٹی مسہ و کس اسے ٹی پنچ پنداوڑی اعزازیہ نا وڑاٹ تننگاکہ نن دادے یکساں کرینن، حکومت نا ہچ ءُ ودکی خڑچہ اس اف۔
