اسلام آباد۔ 28مئی (اے پی پی) ڈپٹی چیئرمین پلاننگ کمیشن سرتاج عزیز پارینے کہ حکومت سائنس و ٹیکنالوجی و چاگڑد نا بشخ آتا شونداری کن پبی گام گیج کننگ ءِ، وژن 2025ء نا رداٹ پلاننگ کمیشن دا بشخ آتے کن اسہ مربوط ءُ ڈٹ بندی اس کرینے ہرانا جوان ءُ نتیجہ اس دوبریک۔ داخیال آتا درشانی ءِ او تدوک آدے سنٹرل ڈویلپمنٹ ورکنگ پارٹی نا دیوان آن تران اٹی کرے۔ دیوان اٹی سائنس اینڈ ٹیکنالوجی نا 6 ڈٹ پیش کننگانے ہرافتیٹی اولیکو ڈٹ کوئٹہ ٹی نسٹ کیمپ انا جوڑ جاڑ کن 2 ارب 62کروڑ 28 لکھ 66روپئی، قراقرم انٹرنیشنل یونیورسٹی ٹی ہاسٹل نا جوڑ جاڑ و گوازی تا آسراتی تننگ کن 31 کروڑ 63لکھ 90 ہزار روپئی، پشاور یونیورسٹی نا اپ گریڈیشن کن 74کروڑ 8 لکھ روپئی، ہائر ایجوکیشن کمیشن پاکستان و چندی ملک آتا نیام اٹ تعلیم و پٹ وپول نا رابطہ غاتے ودفنگ کن ہڑتوم آ کنڈآتا معاہدہ نا ڈٹ پیش کرے ہرانا کل خڑچ 46کروڑ 72لکھ 12ہزار روپئی و گلگت بلتستان اٹی خلائی پٹ وپولی سنٹر نا جوڑ جاڑ کن 66 کروڑ 56لکھ 19 ہزار روپئی نا ڈٹ پیش کننگا۔
