چین پاکستان اقتصادی راہداری ڈٹ انا بنداو گلگت بلتستان ءِ، سی پیک نا فائدہ ہم گلگت بلتستان ءِ ہی ملک سی پیک آن فائدہ ہرفنگ آن گلگت بلتستان ملک انا غٹ آن شونہال علاقہ مریک
اسلام آباد۔ 27 مئی (اے پی پی) وزیراعظم شاہد خاقان عباسی پارینے کہ چین پاکستان اقتصادی راہداری ڈٹ (سی پیک) نا بنداو گلگت بلتستان ءِ و دانا فائدہ ہم گلگت بلتستان ءِ ہی ملک۔ اگہ سی پیک آن فائدہ ہرفنگا تو گلگت بلتستان ملک انا غٹ آن شونہال علاقہ مریک۔ اختلاف رائے اپوزیشن نا حق ءِ ولے ایلو تا موقف ءِ ہم بایدے خف توننگے و اختلاف رائے اصول آتیا بایدے مبنی مرے، اینو گلگت بلتستان نا رہینگوک آتے ملک انا ایلو شار تا بریبر حق دوئی ءِ، پاکستان نا سول سروس اٹی ہم گلگت بلتستان ءِ کوٹہ تننگک۔ یک شنبے نادے گلگت بلتستان کانود ساز اسمبلی آن تران کرسا وزیراعظم پارے کہ اینو نادے گلگت بلتستان اسمبلی کن مزل نا نشان اس جوڑ مریک۔ داکان بیدس اینو نادے علاقہ نا شونداری ٹی ہم کمکار جوڑ مریک۔ نما حق نمے اسکان رسینگک۔ وزیراعظم پارے کہ مسلم لیگ (ن) نا حکومت گلگت بلتستان نا بابت غٹ آن بھلا بدلی داکرینے کہ گلگت بلتستان اٹی فیصلہ کننگ نا اختیار الس نا نمائندہ یعنی گلگت بلتستان نا اسمبلی ءِ تسنے۔ اوپارے کہ گلگت بلتستان نا الس ءِ اوکل حق دوئی ءِ ہرا ملک انا ایلو شاری تے دوئی ارے۔ حق انا بابت غٹ پرخ آتے چٹفنگانے۔ دااِرا بنداوی بدلی تے کننگانے۔ اوپارے کہ نن گلگت بلتستان نا الس ءِ فیصلہ کننگ نا اختیار و حق انا فراوانی نا کاریم ءِ اسہ ایگزیکٹو آرڈر اسے نا کمک اٹ کرینن اگہ دابابت کانود سازی نا ہم گرج مسکہ تو اودے ہم کرفنگاکہ۔ انتئے کہ دا ویل آ کس اسے ہچ ءُ اختلاف اس اف۔ اوپارے کہ گلگت بلتستان کانود ساز اسمبلی نا اپوزیشن نا حق ءِ او اختلاف کے ولے دا بایدے اصول آتیا مبنی مرے۔ اوپارے کہ اختلافی ہیت کرسا ایلو کڑد نا ہم بایدے موقف ءِ خف توننگے۔ اوپارے کہ دا بابت ننا موقف بھاز واضح ءِ کہ و داڑآ ایگزیکٹو آرڈر آ عمل کننگانے۔ وزیراعظم پارے کہ گلگت بلتستان نا الس ءِ حق انا فراوانی و فیصلہ کننگ نا اختیار تننگ کن حکومت گدرینگوک آ ہفت ہشت تُوآن کاریم کریکہ۔ ننا حکومت اٹ گڑاس خلقت نا مخالفت نا باوجود اوفتا واک آتے ہلسا گلگت بلتستان نا السی نمائندہ غاتے تسونن۔ وزیراعظم پارے کہ گلگت بلتستان نا امور نا بنجائی وزیر محمد برجیس طاہر نا وزارت نا مخالفت نا باوجود نن دا کاریم ءِ کرینن۔ اوپارے کہ آئین اٹی ساڑی پرنسپل آف پالیسی گلگت بلتستان اٹی ہم لاگو مریک۔ اوپارے کہ ہژدہ می ترمیم آن پد صوبہ غاتے ہراحق رسینگا او غٹ حق آک گلگت بلتستان ء، ہم دوئی ءُ و گلگت بلتستان نا کانود ساز اسمبلی ءِ اختیار ارے کہ او دا بابت کانود سازی کے۔ اوپارے کہ بنجائی کانود اٹی بدلی نا بابت گلگت بلتستان کونسل تینا کڑد ءِ ادا کیک ولے دا کڑد بیرہ سلابتی مریک۔ اوپارے کہ راست دادے کہ اینو شاید پاکستان ایلو صوبہ غاتا مقابلہ ٹی زیات اختیار ات دوئی ءِ و مخالف آ حیرانی ءِ۔ وزیراعظم پارے کہ گلگت بلتستان نا بابت گڑاس پین بنداوی بدلی ہم کننگانے ہرافتا رداٹ گلگت بلتستان نا گورنر ہندی مریک و پیشن آن ہچ ءُ گورنر اس اتنگپک۔ اوپارے کہ گدرینگوک آ سال انا نسبت آن اینخو نا سیل و سواتی سیزن اٹی سیل و سواتی تا کچ اٹی ودکی مریک و سی پیک نا فائدہ غاتیان گلگت بلتستان ملک انا غٹ آن شونہال علاقہ جوڑ مریک۔ گلگت بلتستان نا اسہ دے ئی دورہ نا وخت آ وزیراعظم تون اوار امور کشمیر و گلگت بلتستان نا بنجائی وزیر محمد برجیس طاہر ہم ساڑی ئس۔
