شاہد خاقان عباسی گلگت نلتر ایکسپریس وے ڈٹ انا بنداو ءِ تخا، وزیراعظم گلگت بلتستان کانود ساز اسمبلی نا ماڑی نا بناءِ ہم کرے
اسلام آباد۔ 27 مئی (اے پی پی) وزیراعظم شاہد خاقان عباسی گلگت بلتستان اٹی چندی شونداری ڈٹ آتا بناءِ کننگ کن یک شنبے نادے اسہ دے ئی دورہ غا گلگت آ سرمس۔ وزیراعظم نا بننگ آ گلگت بالی پٹ آ گورنر میر غضنفر علی خان و وزیراعلیٰ حافظ حفیظ الرحمان تون اوار ایلو بڑزکو کمامدارآک اودے بخیرکریر۔ پاکستان ٹیلی ویژن نا رداٹ وزیراعظم چنارگارڈن گلگت اٹی شہید آتا یات گار آ حاضری تس و پھل آتا چادر اس شاغا و گلگت بلتستان نا آجوئی نا جنگ اٹ شہید آتا روح انا ثواب کن فاتحہ خوانی ہم کرے۔ او گلگت بلتستان کانود سازا سمبلی نا ماڑی نا بناءِ کرے۔ اسمبلی نا دا پوسکن وڑنا ماڑی 91 کروڑ روپئی نا خڑچ آن دُوانزدہ سال اٹ پورو کننگانے۔ تینا دورہ نا وخت آ وزیراعظم شاہد خاقان عباسی گلگت نلتر ایکسپریس وے ڈٹ انا بنداو ءِ ہم تخا۔ داڈٹ 2 ارب 60 کروڑ روپئی نا خڑچ آن مسہ سال اٹ پورو مریک۔ ڈٹ انا پوروی آن ہڑتوم آ علاقہ غاتا نیام اٹ مسافت اِرا گھنٹہ آن کم مرسا نیم گھنٹہ اس سلک ہراڑآن گلگت بلتستان اٹی سیل و سوات نا بشخ ءِ مون آ دننگ اٹ کمک رسینگک۔ وزیراعظم شاہد خاقان عباسی گلگت بلتستان سیکرٹریٹ ڈٹ انا بنداو ءِ ہم تخا۔ تینا دورہ نا وخت آ وزیراعظم گلگت بلتستان کانود ساز اسمبلی و گلگت بلتستان کونسل نا اسیجائی دیوان آن تران ہم کیک۔
