اسلام آباد۔ 27 مئی (اے پی پی) صدرآزاد جموں و کشمیر سردار مسعود خان پارینے کہ آزاد جموں کشمیر کونسل اٹی اصلاحات اسہ تاریخی ءُ گام گیج اسے و داڑآن آزاد کشمیر و پاکستان نا خلقت نا مفاد آتے پین سوگوی رسینگک ۔ صدرآزاد جموں و کشمیر سردار مسعود خان نا کنڈآن جاری بیان اٹی پاننگانے کہ غٹ سیاسی جماعت و واک آتے تینا صف آتیٹی پورو سیوت و یکجہتی نا مظاہر ہ ءِ کرسا بایدے اسہ منصفانہ ءُ فارمولہ اس طے کیر۔ ہراڑآن آزاد کشمیر حکومت ءِ پورو انتظامی و مالی واک ملنگ کے داڑآن پاکستان و آزاد کشمیر نا نیام اٹ تعلقداریک پین سوگو مریرہ۔ اوپارے کہ آزاد جموں کشمیر کونسل اٹی اصلاحات نا خواست آزاد کشمیر نا خلقت نا متکن آ تغ ئس ہرانا پوروی نا داسہ وخت بسنے ۔ صدر پارے کہ داسہ وخت اس کہ فاٹا و گلگت بلتستان نا بابت تاریخ ساز گام گیج چست کننگانے تو آزاد کشمیر ہم بایدے ہچ ءُ حالیت اسے اٹ پدی سلپ، داتاریخی و انقلابی اصلاحات و بدلی تا بھلو دورس و گچین ءُ نتیجہ اس بریک ۔ صدر پارے کہ کونسل اٹی اصلاحات کرسا اِرا پلو ءِ خاص وڑ اٹ مون آ تخنگانے کہ داڑآن آزاد کشمیر و پاکستان نا نیام اٹ بندھن و کشمیر نا ویل آ انت زہم تمک۔
