اسلام آباد۔ 26 مئی (اے پی پی) وزیراعظم شاہد خاقان عباسی پارینے کہ قومی امنائی اٹ غٹ ویل آتا ایسری ءِبایدے کشنگے، قومی امنائی ءِ دوئی کننگ سیاست دان تا کاریم ءِ، پاکستان مسلم لیگ (ن) نا حکومت الس نا خذمت ءِ کرے و پاکستان ءِ سوگو کرے، پاکستان بیرہ جمہوریت نا سوب آن شون ہلیک ، قوم انا مون آ داوا و کاریم اٹی پرخ سفا ءِ ، ہراخلقت سیاسی وفاداری بدل کرینو اوڑآن پاکستان یا پاکستان نا سیاست ءِ ہچ ءُ فائدہ اس رسینگتنے، پاکستان نا الس داوڑنا خلقت ءِ شرف نا قابل سمجھپک ۔ جولائی ٹی پاکستان نا الس اسہ وار ولدا پاکستان مسلم لیگ (ن) آ پت انا درشانی ءِ کیرہ، شہید بے نظیر بھٹو پول انا ڈٹ آن علاقہ نا خلقت ءِ آسراتی مریک ۔ وزیراعظم داخیال آتا درشانی ءِ راجن پور نا علاقہ کوٹ مٹھن اٹی این 55و این 5ءِ ملفوک آ پول انا بناءِ کننگ آن پد اڈ ہلوک آ دود آن تران کرسا کرے۔ شہید بے نظیر بھٹو پول دریائے سندھ آ جوڑ جاڑ کننگانے۔ دریائے سندھ آ جوڑ جاڑ کروک آ بے نظیر بھٹو شہید پول انا ڈٹ جی ٹی روڈ آ واقع ظاہر پیر(این5) و انڈس ہائی وے (این 55) آ واقع کوٹ مٹھن ءِ ملفنگ اٹ کمکار جوڑمریک۔
