شجاع آباد۔ 26 مئی (اے پی پی) وزیراعظم شاہد خاقان عباسی پارینے کہ پاکستان نا شونداری بیرہ سیاسی سوگوی آن ہی مننگ کیک، نن ہروڑنا نظام ءِ اُرانن ہرافتیان خاص ءُ نتیجہ دوئی متنے، پاکستان بیرہ جمہوریت اٹ ہی مون آ کاہک۔ پاکستان مسلم لیگ (ن) پنچ سال اٹی ارب آ روپئی نا شونداری ڈٹ نئے بیرہ بناءِ تا کرے بلکن اوفتے پورو ہم کرفے ہرانا 65سال انا تاریخ اٹی مثال ملیپک۔ ملتان ۔ سکھر موٹروے نا ملتان شجاع آباد بشخ انا پوروی آن علاقہ نا الس بیرہ منہ گھنٹہ ٹی لاہور، کراچی و اسلام آباد آ سرمننگ کیرہ ہرا تخو ک آ وخت آن اسہ سال مست پورو کننگ انگ ءِ۔ داخیال آتا درشانی ءِ وزیراعظم ملتان، سکھر 294 ارب روپئی خڑچ انا ڈٹ انا ملتان آن شجاع آباد بشخ انا بنائی دود آن تران کرسا کرے۔ داکان مست وزیراعظم دا عظیم الشان ڈٹ انا بناءِ کرے۔ وزیراعظم پارے کہ شجاع آباد آ بسٹ کنے بھاز خوشی مس کہ حکومت ہراوعدہ ءِ کریسس نئے بیرہ پورو کرے بلکن داکان زیات کاریم کرسا نشان تسنے۔ اوپارے کہ داڈٹ 2019 ء ٹی پورو مروئی ئسک ہرااسہ سال اس مست پورو کننگ انگ ءِ۔ وزیراعظم شاہد خاقان عباسی تدینگوک آ حکومت آتا ڈٹ کروڑآتا مرور ولے ساڑی حکومت بیرہ پنچ سال اٹی ارب آ روپئی نا ڈٹ نئے بیرہ بناءِ کرے بلکن پورو ہم کرفے ۔ وزیراعظم تدوک آ نن شکست اٹی تپاخت کروک آ پنچ مزور آتا شہیدی آ است ہسونی نا درشانی ءِ کرے و پارے کہ جوڑ جاڑی کمپنی ہم تپاخت کروک و ٹھپی مروک آ مزور آتے معاوضہ ایتک ہراڑکن پارت جاری کننگانے و بنجائی حکومت نا کنڈآن شہید آتا خاہوت کن فی کس دہ لکھ روپئی و ٹھپی تے کن فی کس پنچ لکھ روپئی امداد نا ہم پڑو ءِ کرے۔
