وزیراعظم اینو سویلی پنجاپ نا شار شجاع آباد و راجن پور نا دورہ ءِ کننگ ءِ، شاہد خاقان عباسی اِرا بھلو ڈٹ انا بناءِ کیک

اسلام آباد۔ 26 مئی (اے پی پی) وزیراعظم شاہد خاقان عباسی (اینو) ہفتہ نا دے سویلی پنجاپ نا شار شجاع آباد و راجن پور نا دورہ ءِ کننگ ءِ ہراڑے او اِرا بھلو ڈٹ انا بناءِ کیک ہرافتے ٹی سکھر ، ملتان موٹروے (ایم5) نا ملتان شجاع آباد سیکشن و دریائے سندھ آ شہید بے نظیر بھٹو پول انا ڈٹ اوار ءُ۔ تینا دورہ نا وخت آ وزیراعظم اول شجاع آباد آ کاہک ہراڑے او ملتان شجاع آباد سیکشن نا بناءِ کیک ، اوکان پد او راجن پور نا علاقہ مٹھن کوٹ اٹی این 55 و این 5ءِ ملفوک آ پول انا بناءِ کیک۔ شہید بے نظیر بھٹو پول دریائے سندھ آ جوڑ جاڑ کننگانے۔ وزیراعظم ہاؤس آن جاری بیان نا رداٹ موٹروے سیکشن آن ملتان و شجاع آباد نا نیام اٹ سفری آسراتی ٹی ودکی و آسانی مریک۔ سکھر ملتان موٹروے کراچی، لاہور موٹروے ڈٹ انا بشخ اسے ہرا چین پاکستان اقتصادی راہداری ڈٹ انا رداٹ جوڑ جاڑ کننگ انگ ءِ۔ داڈٹ آ 2016 ء ٹی کاریم نا بناء ءِ کننگاسس ہرا 2019ء ٹی پورو مریک۔ دا شش رویہ روڈ ءِ ہرا گھوٹکی، رحیم یار خان، صادق آباد و بہاولپور تون اوار چندی بھلا شار تیان گدرینگک۔ داروڈ صوبہ سندھ ءِ صوبہ پنجاپ تون ملفنگ اٹ ہم اہم کڑد ادا کیک۔ داڈٹ اٹی پول، انٹرچینج و انڈر پاسیز تون اوار سروس ایریا غاتیان بیدس ایلو آسراتیک ہم اوار ءُ۔