شیخوپورہ۔ 25مئی (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) کارکڑد و خذمت نا بنداو آ گچین کاری تیٹی بریک، الس پورو جوزہ و جوش اٹ مسلم لیگ (ن) ءِ سرسہب کرفک، الس بہروپیہ و وفاداری بدلینگوک آتیان تینے بچفیو الیکشن اٹ اوفتے اواوفتا ورندی ءِ ایتے۔ نن مچ آ ملک اٹی شونداری کاریم تا جال اس شاغانن ۔ او جمعہ نا دے شیخوپورہ غان بیدس ماناوالہ ٹی گیس فراوانی ڈٹ انا بنائی دود آن تران کریکہ۔ داوخت آ بنجائی وزیر دفاعی پیداوار رانا تنویر ، باسک قومی اسمبلی عرفان ڈوگر و باسک اسمبلی آن بیدس علاقہ نا سرکڑدہ غاک ہم ساڑی ئسر۔ وزیراعظم پارے کہ شیخو پورہ ناالس ہراجوش و جوزہ اٹ پاکستان مسلم لیگ (ن) ءِ مدام سرسہب کرینے ، او جوش اینو ہم اوفتے ٹی ارے، ایلو شار و حلقہ غاتیامبار جولائی نا لس گچین کاری تیٹی اسہ وار ولدا دا علاقہ نا الس مسلم لیگ (ن) ءِ پبی وڑاٹ سرسہب کرفرہ۔ اوپارے کہ پاکستان مسلم لیگ (ن) مچ آ ملک اٹی شونداری کاریم تا جال اس شاغانے ہرانا مثال دا علاقہ ٹی گدرینگوک آ 5سال اٹی پونے مسہ ارب روپئی نا ڈٹ ءِ۔ اوپارے کہ پاکستان نا تاریخ اٹی ساڑی آ حکومت ریکارڈ شونداری کاریم کرفے، بیرہ ضلع شیخو پورہ ٹی 10 ارب روپئی نا شونداری کاریم کننگا، مسلم لیگ (ن) نا حکومت آن بیدس پین اسہ حکومت اس ہم ضلع شیخو پورہ نا کنڈآ چکار کتنے۔
