ورکرز ویلفیئر فنڈ انا مد اٹی وصولی 10 ارب 83کروڑ، ادائیگیک 10 ارب 90 کروڑ آن زیات ئسر
اسلام آباد۔ 24مئی (اے پی پی) وزیر مملکت خزانہ رانا محمد افضل پارینے کہ ورکرز ویلفیئر فنڈ انا مد اٹی 10 ارب 83کروڑ روپئی نا وصولی مسنے۔ پنچ شنبے نادے قومی اسمبلی ٹی غلام سرور خان نا ورکرویلفیئر فنڈ (ڈبلیو ڈبلیو ایف) جاری کپننگ نا بابت چکار کرفوک نوٹس نا ورندی ءِ ترسا رانا محمد افضل خان پارے کہ ورکرز ویلفیئر فنڈ انا مد اٹی 10 ارب 83 کروڑ روپئی نا وصولی مسنے وخت اس کہ دابابت جاری مروک آ پیسہ غاک زیات ءُ۔ داسوب مشکل آتا مون تروکی ءِ۔ اسہ پین سوج اسے نا ورندی ٹی اوپارے کہ دافنڈ مزور آتا ویلفیئر نا فنڈ ءِ۔ داٹی ڈیتھ و میرج گرانٹ کن ہم پیسہ جتا کننگک۔ اوپارے کہ ادارہ بروک آ سال گچین بجٹ اس ایس تو اودے پیسہ تننگک۔ ننتون ڈبلیو ڈبلیو ایف نا ہچ ءُ پد سلوک ءُ درخواست اس اف۔ درخواست اس برے تو سجفنگ مریک۔ داکان مست غلام سرور خان چکار کرفوک نوٹس آ پارے کہ نیزگار مزور آتے مشکل آتا مون تروکی ءِ۔ وزیر مملکت خزانہ پارے کہ اینخو نا سال ہم اِرا ارب روپئی زیات ادائیگی کننگانے۔ حکومت تون ڈبلیو ڈبلیو ایف نا 10 ارب روپئی جمع ءُ۔ اینخو نا سال داادارہ نا ادائیگیک 10 ارب 90 کروڑ آن زیات ئسر۔
