اسلام آباد۔23مئی (اے پی پی) مزن وزیر شاہد خاقان عباسی ءَ گوں وانگءُ زانگ ءُ کسبی امور ءِ بنجاھی وزیر ءُ مزن وزیر یوتھ پروگرام ءِ چیئرپرسن لیلیٰ خانءِ ھمرائی ءَ مزن وزیر یوتھ ٹریننگ سیکم ءِ انٹرنیز ءَ چارشمبے ءِ روچءَ مزن وزیر کارگسءَ گندءُ نند کتگ۔ اے انٹرنیز ءَ انوں زوتاں پاکستان ءِ دگہ دگہ مزن شاہ برجاھ آں چہ ایم اے ءُ بی ایس ءِ ڈگری ھاسل کتگ۔ پاکستان مسلم لیگ(ن) ءِ حکومت ءَ اپریل ، مئی 2016ءَ مزن وزیر یوتھ پروگرام ءِ 6اسکیم آنی بندات کتگءُ یوتھ ٹریننگ سکیم آئیءِ بھر اِنت کہ ایشی ءِ مول ءُ مراد ورناھ آناں روزگارءَ ھوار کسبی کارءُ ہنر پجارینگ اِنت۔ اے اسکیم ءِ ردءَ ایم اے ، سئے سالی ڈپلومہ ایسوسی ایٹ انجینئرنگ یا وفاق المدارس ءَ چہ شہاب العالمیہ ءِ نودربر آناں 12ماہ ءَ 15ہزار کلدار پگار دیئگ بیت۔ تاں انوں 95ہزار نوکیں گریجویٹس ءَ را سکیم ءِ اولی ءُ دومی بھرءِ ردءَ نجی ءُ سرکاری پڑ ءِ ادارگ/مھکمہ آنی تہا انٹرن شپ دیئگ بوتگ۔ مزن وزیر شاہد خاقان عباسی ءَ سکیم ءِ سوبمندی ءِ سرءَ سدکی ءِ درشانی کتگءُ ورناھیں گریجویٹس ءِ جوشءُ جزبگءَ را ساڑاتگ۔ آئیءَ ورناھ آنی سرءَ زورپِرداتگ کہ آ محنت ءُ جدوجہدءِ گوما ملکی سماجی ءُ معاشی دیمروئی ءِ تہا وتی کردءَ پیلو بہ کن اَنت۔
