قومی سلامتی کمیٹی نا کنڈآن آزاد کشمیر و گلگت بلتستان نا حکومت آتے انتظامی امور، مالیاتی واک آتا گدریفنگ ستاء کڑزک، صدر آزاد کشمیر سردار مسعود خان

اسلام آباد۔ 21مئی (اے پی پی) آزاد جموں کشمیر نا صدر سردار مسعود خان پارینے کہ قومی سلامتی کمیٹی نا کنڈآن آزاد جموں و کشمیر و گلگت بلتستان نا حکومت آتے انتظامی معاملہ غاتون اوار مالیاتی اختیار آتا گدریفنگ ستاء کڑزک انتئے کہ دا ہندا علاقہ غاتا الس کن پین شونداری و شونہالی اتیک۔ دوشنبے نادے اسہ نجی ٹی وی چینل اسے تون ہیت وگپ کرسا اوپارے کہ انتظامی معاملہ و مالیاتی واک آتا گدریفنگ ہڑتوم آ آزاد جموں و کشمیر و گلگت بلتستان نا الس نا متکن انگا خواست ئس ہرادے ساڑی آ بنجائی حکومت پورو کرینے۔ اوپارے کہ آزاد جموں و کشمیر نا حکومت تینا السءِ ریلیف تننگ کن گچین و ٹھوس گام گیج کننگ ءِ۔ مقبوضہ کشمیر اٹی کودک کشمیری تیا بھارتی بیدادی نا مذمت ءِ کرسا او پارے کہ بھارت مقبوضہ وادی ٹی ریاستی دہشت گردی ٹی اوار ءِ۔ اومستی پارے کہ مودی حکومت کشمیری تا پرامن تحریک آزادی نا جہد ءِ توننگ کن مقبوضہ کشمیر اٹی دہشت گردی نا بناءِ کرینے و کودک کشمیری تا لس خون ءِ کننگ انگ ءِ۔