’’وزیراعظم نا 100/100/100 ایجوکیشن پروگرام ‘‘ نا بناءِ کرے
اسلام آباد۔ 21مئی (اے پی پی) وزیراعظم شاہد خاقان عباسی پارینے کہ بنجائی حکومت طالب علم آتے پوسکن ءُ نصاب و آب اٹ تعلیم نا فراوانی نا کمک اٹ ملک اٹی بڑزکو تعلیمی معیار مقرر کرینے، صوبہ غاک ہم دانا پیر وی ءِ کیر۔ اوداہیت ءِ وزارت بنجائی تعلیم و کسبی تربیت نا کنڈآن پوسکن آ نصاب و درسی کتاب آتا جاری کننگ نا دود آن تران کرسا پارے ہرا دوشنبے نادے وزیراعظم آفس اٹی اڈہلک۔ وزیراعظم پارے کہ اسہ ملک اس ہم تینا ورناتے آب اٹ تعلیم نا فراوانی آ چکار کننگ آن بیدس شون ہلنگ کپک۔ بنجائی دارالحکومت نا علاقہ تعلیم نا معیار آتے بڑز کننگ کن ایلو صوبہ غاتے کن ماڈل نا وڑاٹ کاریم کیک۔ وزیراعظم نیشنل ٹیسٹنگ سروس نا جوڑ کننگ نا گرج آ ہم زور شاغا تانکہ مچ آ ملک انا تعلیمی بورڈ آتا کنڈآن تروک آ تعلیم نا کہول انا معیار بندی ءِ کننگ مرے۔ وزیراعظم پارے کہ داوخت آ صوبہ غاتا کنڈآن ہراجتا معیار آتا پیروی ءِ کننگ انگ ءِ اوفتا جاچ ءِ ہلنگ مشکل ءِ۔ اومیت ءِ کہ بروک آ حکومت دا چیلنج آتون مون ایتک۔ داکان مست وزیراعظم بنجائی دارالحکومت نا اسکول آتے کن پوسکن ءُ نصاب و درسی کتاب جاری کرے۔ اولیکو مرحلہ ٹی جماعت اول آن پنچ اسکان کتاب آتے اپ گریڈ کننگانے اوکان پد ارٹ میکو مرحلہ ٹی ششم آن ہشتم اسکان کتاب آتے اپ گریڈ کننگک وخت اس کہ مسٹ میکو و آخریکومرحلہ ٹی جماعت نہم آن دُوانزدہ اسکان نا کتاب آتے گچین جوڑ کننگ۔ دود اٹی وزیر کسبی تعلیم و تکنیکی تربیت انجینئر بلیغ الرحمان و سیکرٹری تعلیم اکبر حسین درانی ئسک ہم ساڑی ئسر۔ وزیراعظم شاہد خاقان عباسی ’’وزیراعظم نا 100/100/100 ایجوکیشن پروگرام ‘‘ نا ہم بناءِ کرے ہرانا مسخت بنجائی علاقہ ٹی 100 درسد اندراج ، 100 درسد تعلیمی پوروی و 100 درسد خواندگی ءِ المی جوڑ کننگ نا ءِ۔ اواومیت ظاہر کرے کہ ایلو صوبہ غاک ہم دا گام انا پیروی ءِ کیرہ۔
