اسلامی کانفرنس ءِ گل ءِ اسرائیلءِ زوراکی ءِ نتیجگ ءَ فلسطینی آنی لگت مالی ءَ را مذمت، القدس ءَ را اسرائیل ءِ دارالحکومت نامینگ ءِ پد ءَ امریکی گامگیج فلسطینی الس ءِ کانودی، راجدپتری، ابرمی ءُُ راجی ھک آنی سر ءَ ارش ءُُ ایمنی ءِ امیت، میاں اوستمانی ایمنی ءُُ سلامتی ءِ واستہ پہ زانت بیم ءِ پیداک کنگ ءِ کوشست اِت
استنبول ۔ 19 مئی (اے پی پی) اسلامی کانفرنس گل (او آئی سی) ءَ اسرائیلی لٹ ءُُ پُل ءِ نتیجگ ءَ بے کسوریں الس آنی لگت مالی ءَ را مذمت کنان ءَ میاں اوستمانی برات آں گوں دست بندی کتگ کہ آ اسرائیلی آنی کتگیں ظلم آنی سرءَ نوٹس بہ زور آں۔ القدس ءَ را سرائیل ءِ دارالحکومت نامینگ ءِ امریکی گامگیج فلسطینی الس ءِ کانودی، راجدپتری ءُُ راجی ھک آنی سر ءَ ارش ءِ گامگیج، میاں اوستمانی ایمنی ءُُ سلامتی ءِ واستہ پی زانت بیم پیداک کنگ ءِ کوشست اِنت، القدس شریف ءَ را سرائیل ءِ دارالحکومت تسلیم کنگ یا آھودا چہ وتی سفارتخانہ ءَ روان دیوکیں ملک آنی ھلاپ ءَ پہ زانت سیاسی، اقتصادی ءُُ ایندگہ رنگ ءِ گامگیج کنگ بنت۔ اے گپ ترکی ءِ شہر استنبول ءَ اسلامی کمکی گل او آئی سی ءِ لس سروکی دیوان ءِ گڈ ءَ جاڑی بوتگیں جار ءِ تہ ءَ گوشتگ اَنت۔ یکجائی جار ءِ تہ ءَ گوشگ بوت کہ فلسطینی الس ءِ ھلاپ اسرائیل ءِ لگت مالی ءُُ القدس شریف ءَ امریکی سفارتخانہ ءِ گیر کانودی رنگ ءَ بنگیج ءَ چہ پیداک بوھوکیں جاور ھال آنی چار ءُُ تپاسی ءِ واستہ اسلامی کمکی گل (او آئی سی) ءِ سروک حکومت ءُُ ریاست ءُُ شاہان ءِ 17 ھپتدھمی لس دیوان ترکی ءِ صدر ءُُ او آئی سی ءِ 13سیزدھمی سیشن ءِ چیئرمین رجب طیب اردوان ءِ دعوت ءِ پد ءَ 18مئی 2018ءَ استنبول ءَ برجم دارگ بوت۔ دیوان ءَ ریاست فلسطین ءِ بیم ناکیں دمگ آنی تہءَ ھوپ ءُُ ترس ءِ جاور ھال ءُُ ایشی ءَ کشاں چین آنی سر ءَ چار ءُُ تپاسی زورگ بوت۔ بھر زوروکیں مردم آں سعودی عرب ءِ شہر دہران ءَ عرب لیگ ءِ 29سروکی دیوان ءَ فلسطین ءِ ھوالگ ءَ منوگری ءُُ سروکی دیوان ءَ ’’القدس سمٹ‘‘ ءِ نام دیگ ءِ سعودی فرمانروا شاہ سلمان بن عبدالعزیز ءِ گامگیج ءِ توسیپ کت۔ بھر زوروک آنی سر ءَ زور پر دات کہ او آئی سی ءِ بنیاتی مول ءُُ مراد منشا القدس شریف ءِ راجدپتری ءُُ کانودی ءُُ روحانی ارزشت ءِ رکھینگ اِنت ءُُ اسرائیل ءِ نیمگ ءَ چہ ھمک رنگ ءِ ھلاپ ورزی ءِ گر ءُُ دار کنگ ءِ واستہ السمی گامگیج کنگ ءُُ اسرائیل ءِ نوک آبات بوھوکیں ءُُ ’’نسل پرستی‘‘ پالیشی آنی ھلاپ ءَ فلسطینی الس ءِ کمک کنگ اِنت۔
