اسلام آباد ۔ 18 مئی (اے پی پی)راجی اسمبلی ءَ آوکیں مالی سال 2018-19ء ءِ 5900 ارب کلدار ءَ چہ گیش حجم ءِ بنجاہی بجٹ ءِ منظوری داتگ۔ بجٹ ءَ کشتءُْ کشاری،ڈیری ءُْ پولٹری ءِ تکانی حاترا ریلیف ءِ شؤر دیگ بوتگ۔قومی اسمبلی ءَ بجٹ گشتانک ءِ بندات کنان ءَ حزانگ ءِ بنجائی وزیر مفتاح اسماعیل ءَ گشتگ کہ بجٹ ءَ ابید سرکار یک روچے ہم بوت نہ کنت۔ ایشی ءَ ابید سرکار بندءُْ بوجاں دیما برت نہ کنت۔اے بجٹ مہلوک ءِ واہشتانی ردا اِنت۔ سرکار ءَ تباہ بوتگیں معشیت ئے رستگ ات۔ ملک ءَ زرکاری ءُْ دیمروی کم ات۔ مئی 2013ءَ سرکار اتک ءُْ معیشت ءِ گہتری ءِ حاترا پروگرام دات۔ پنچ سالاں سکیں جہد کتگ۔ مشکلیں فیصلہ کتگ۔ زاتی پائدگاں دلگوش دیگ نہ بوتگ۔حزانگءِ وزیر ءَ بجٹ پیش کنان ءَ گشتگ کہ نان فائلر کمپنی ءِ سرا ود ہولڈنگ ٹیکس ءِ شرح 7درسدءَ چہ گیش کنان ءَ 8 درسد کنگءِ شؤر اِنت۔ کہ ایشی ءَ چہ 4لکھ ءَ چہ8لکھ آمدن ءِ سرا یک ہزار کلدار انکم ٹیکس جنئگ بوتگ۔8لکھ ءَ چہ 12لکھ آمدنءِ سرا 2 ہزار کلدار پہ نامیں انکم ٹیکس جنئگ بوتگ۔آئیءَ گشتگ کہ نان فائلراں 40لکھ کلدار ءَ چہ گیش مالیت ءِ مڈی بہا زورگءِ اجازت نہ بیت۔ ٹیکس دیوکاں 3 سالءَ یک ءَ چہ گیش رندا آڈٹءِ دیما کپگ نہ بیت۔حزانگءِ بنجائی وزیر ءِ گشگ ات کہ فرٹیلائزر مینو فیکچررزءِ حاترا ایل این جی ءِ درآمد ءِ سرا استیں 5 درسد سیلز ٹیکس ھلاس کنگ بوتگ وھدیکہ ایل این جی ءِ درآمدءِ سرا 3 درسد ویلیو ایڈیشن ٹیکس ھلاس کنگ بوتگ ءُْ ایل این جی ءِ درآمد،آر ایل این جی ءِ سپلائی ءِ سرا 17درسد سیلز ٹیکس کم کنگ بوتگ۔مفتاح اسماعیل ءَ گشتگ کہ شرح نمو5.79درسد بیت کہ اے گوستگیں 13سالاں درستاں چہ گیش اِنت۔ پاکستان ترندی ءَ گوں دیمروی کنوکیں ملکانی لڑءَ ھوار بیت ءُْ مروچی ملک دنیا ءِ 24 می مزنیں معیشت اِنت۔ استیں مالی سال ءَ مارچ ءَ تاں افراط زر ءِ کساس 3.8بیت۔گوستگیں 5 سالانی وھداں ٹیکس گرگ ءَ گیشی بوتگ۔حزانگءِ وزیر مفتاح اسماعیلءَِ بجٹ گشتانک دیانءَ گشتگ کہ یک جولائی دوہزارہڑدہءَ چہ سول،فوجی ملازمانی پگاراں 10درسد ایڈہاک ریلیف الاؤنس کنگ بوتگ۔ درائیں پنشنزءِ حاترا ہم 10 درسد گیشی کنگ بوتگ وھدیکہ ہاؤس رینٹ الاؤنس ءَ ہم پنجاہ درسد گیشی کنگ بوتگ۔ پنشن ءِ کم چہ کم حد 6 ہزار ءَ چہ گیش کنان ءَ 10 ہزار کلدار کنگ بوتگ۔ فیملی پنشن ءَ چارہزار پنچ سد کلدار ءَ چہ گیش کنان ءَ ہپت ہزار پنچ سد کنگ بوتگ۔ ہپتادءُْ پنچ سال ءَ چہ گیش عمر ءِ پنشنز ءِ حاترا کم چہ کم پنشن پانزدہ ہزار کلدار ایر کنگ بوتگ۔حزانگ ءِ بنجائی وزیر ءَ گشتگ کہ راجدپتر ءِ کم تریں کساسءَ سودءِ سبب ءَ ملک ءَ دیمروی ءِ موھ پیداک بوتگ اَنت۔ زرعی وامانی سرا سود ءِ کساس ہم باز کم بوتگ۔ نہاداں مھکمی پاکستان ءِ راجدپترءَ نہ رسیت۔آئیءَ گشتگ کہ 2013ءَ بی آئی ایس پی ءِ ذریعہ ءَ 37لکھ کہولانی حاترا 40ارب کلدار ایر کنگ بوتگ اتنت۔2013ءَ اے پروگرام ءِ حاترا یک کہولے سئے ماہی وظیفہ سئے ہزار ایر کنگ بوتگ ات بلے ما ناایوک ءَ ایشی ءِ حجمءَ 113ارب کلدار ءَ تاں گیشی کتگ بگندے یک کہولے سئے ماہی وظیفہ چارہزار ہشت سدءُْ سی ءُْ چار کلدار کتگ۔بنجائی وزیرءَ گشتگ کہ سگریٹانی سرا فیڈرل ایکسائز ڈیوٹی ءَ گیشی ءِ شؤر اِنت کہ ایشی ءِ ردا ٹیئرون سیگریٹ ءِ سرا فیڈرل ایکسائز ڈیوٹی 3ہزار نوسد شست ءُْ چار کلدار ایر کنگ بوتگ۔ ٹیئر ٹو سیگریٹ ءِ سرا یک ہزار ہپت سد ہپتاد کلدار ءُ ٹیئر تھری سیگریٹ ءِ سرا فیڈرل ایکسائز ڈیوٹی ہشت سد چل ءُْ ہشت کلدار ایر کنگءِ شؤر دیگ بوتگ۔بجٹ کاگدانی ردا برجائیں حرچانی حاترا چارسد ءُْ ہپتاد ءُُ ہشت ارب ایر کنگ بوتگ اَنت۔بنجائی سرکار ءِ دیمروی پرگرام ءِ حجم یک ہزار یک سد ءُْ پنجاہ ءُْ دو ارب ءُْ یک کروڈ کلدار بیت۔ جنرل پبلک سروسز ءِ سرا حرچ 3 ہزار سئے سدءُْ چل ارب کلدار بنت۔ استیں مڈیاں ٹیکسانی بہر دوہزار پنچ سد نود ارب کلدار ایر کنگ بوتگ۔ کاگداں مڈیانی کساس چار ہزار ہپت سد سینزدہ ارب ہپتاد کروڈ کلدار ایر کنگ بوتگ وھدیکہ درملکی رستگیں مڈی یک ہزار یک سد ءُْ ہڑدہ ارب کلدار ایر کنگ بوتگ اَنت۔حزانگءِ وزیرءِ گشگ ات کہ کارمرز بوتگیں پچ ءُْ چمپلانی سرا 3درسد ویلیو ایڈیشن ٹیکس ھلاس کنگ بوتگ۔مفتاح اسماعیل ءَ گشتگ کہ لیپ تاپ،کمپیوٹرءِ تیاریءِ 21پرزہ جاتءِ درءَ چہ لوٹائینگءِ سرا ٹیکس ھلاس کنگ بوتگ۔آئیءَ گشتگ کہ کراچی ءَ زِری آپ ءَ کارمرزءِ قابل جوڑ کنگءِ حاترا پلانٹ جوڑ کنگ بیت کہ ایشی ءَ چہ روچے پنجاہ ملین گیلن آپ ءِ پجارینگ بوت کنت۔حزانگءِ بنجائی وزیرءَ گشتگ کہ کینسرءِ درائیں درمانانی سرا کسٹم ڈیوٹی ھلاس کنگءِ شؤر اِنت۔نظرءِ عینکءِ سرا کسٹم ڈیوٹی یازدہ ءَ چہ کم کنان ءَ 3 درسد کنگ ءِ شؤر اِنت۔(ن۔ا۔ج)
