اسلام آباد۔ 18 مئی (اے پی پی) چین پاکستان اقتصادی راہداری (سی پیک) ڈٹ اسیجائی شونداری و شونہالی نا ضامن ءِ، پاکستان تینا جغرافیائی محل و وقوع نا سوب یورپ و ایشیائی ملک آتا نیام اٹ پول انا کڑد ادا کننگ ءِ و ڈیہہ ٹی واپار ، اقتصادی و اایلو رابطہ غاتے کن راہداری فراوان کننگ ءِ۔ معاشی وڑاٹ سوگو پاکستان ہی دہشت گردی و انتہاء پسندی ءِ شکست تننگ کیک و علاقائی سوگوی ءِ المی جوڑ کننگ کیک۔ سی پیک سیکرٹریٹ نا کمامدارآتا رداٹ پاکستان اٹی اقتصادی و صنعتی شونداری کن پاک چین اقتصادی راہداری (سی پیک ) نا رداٹ اسیجائی کاروباری ماڈل اتون اوار اوار اسکل ڈویلپمنٹ و کاروباری بندغ آتا تین پہ تین رابطہ غاتے مون آ دننگ انگ ءِ ، سی پیک نا رداٹ انفراسٹرکچر ، توانائی، اقتصادی زون تا جوڑ کننگ تون اوار چندی ڈٹ آتا پوروی آن پاکستان نئے بیرہ پائیدار شونداری نا دوئی کننگ اٹ سرسہب مریک بلکن لکھ آ ورناتے روزگار نا وارخواہی دوبریک و الس نا راجی شرحالی ہم المی مریک۔ اوپاریر کہ سی پیک نا بنائی ڈٹ 2017-18 ء ٹی پورو مریک وخت اس کہ نیام وختی ڈٹ 2020 ء آن ہلیس 2025ء اسکان و مریس وختی ڈٹ 2020 ء آن ہلیس 2030 اسکان پورو مریک۔ اوپاریر کہ تھرکول ، پن بجلی و متبادل توانائی نا کمک اٹ ہڑزآن چاگڑد دوست بجلی نا ڈٹ آتیا ترندی اٹ کاریم مننگ ءِ ، ہرافتے ٹی کیہی ڈٹ آتیان دسمبر 2018 ء اسکان پیداوار بناء کیک و ملک اٹی توانائی نا تنکی نا مون ءِ توننگک۔
