کانفرنس پاکستان نا پرامن ملک انا وڑاٹ دروشم ءِ تالان کرے، دودوربیدگ روایت آتیان پُر مابت نا کلہو ہم پیشن نا ملک آگدریفنگا
اسلام آباد۔ 15مئی (اے پی پی) قومی خبررساں ادارہ ’’اے پی پی‘‘ نا کنڈآن اِرادے ئی انٹرنیشنل کانفرنس آف نیوز ایجنسی تا وخت آ داڑے ہندی ہوٹل اٹی درملکی مہمان تا اعزاز اٹی اسہ دودوربیدگ شو اسے نا بست و بند کننگا، ہراٹی پنی موسیقار و لوک فنکار آک تینا فن ءِ نشان ترسا بشخ ہلوک آتا است ءِ خوش کریر۔ دنیا نا 18 ملک آتیان بروک درملکی مہمان و ہندی بشخ ہلوک آ دارنگ رنگی پروگرام نا چس ہلکر و فنکار آتا کارکڑد انا ستاءِ کریر۔ موسیقی نا دا پروگرام اٹی پاکستان نا چندی بشخ آتیان بروک آ فنکار و دودوربیدگی رقص پیش کریر ہرافتیان چین ، انڈونیشیا، آذربائیجان، ایران، رومانیہ ، اومان، بلغاریہ، ترکی، لبنان ، سوڈان ، شام و تیونس نا مہمانک بے حد چس ہلکر۔ داوخت آ پنی موسیقار استاد سائیں رئیس احمدخان وائلن آ تینا فن نا شاندار مظاہر ہ ءِ کرے۔ دیدار حسین ڈھول خلسا بشخ ہلوک آ تیان داد ہلک وخت اس کہ خیبرپختونخوانا لوک فنکار رباب آ تینا فن نا جادو ءِ نشان تسر۔ درملکی ڈل آتے پاکستانی دودوربیدہ آن روشناس کرفنگ کن دا ایسری پروگرام اٹی چندی زند انا بشخ آتیان تعلق تخوک آ بندغ آک شرکت کریر۔ دود اٹی بشخ ہلوک آک 18 ملک آتا میڈیا پروفیشنلز اتون اوار اوار ملک انا چندی بشخ آتیان پاکستانی دودوربیدگ ءِ تالان کننگ کن فنکارآتے مدعو کننگ آ اے پی پی نا منیجنگ ڈائریکٹر مسعود ملک نا کوشست آتا ستاءِ کریر۔ دود انا ایسری آ منیجنگ ڈائریکٹر ایسوسی ایٹڈ پریس آف پاکستان کارپوریشن (اے پی پی) کانفرنس ءِ سرسہب جوڑ کننگ آ منتظمین نا منت واری ءِ ہرفے و اوفتے ٹی شیلڈ و سرٹیفکیٹ بشخ وپانٹ کرے۔
